New Era Newspaper

New Era Epaper
Icon Collap
...
Home / Omahangano omafudiko a piyaanekwa konghalo yomoSouth Africa

Omahangano omafudiko a piyaanekwa konghalo yomoSouth Africa

2021-07-22  Festus Hamalwa

Omahangano omafudiko a piyaanekwa konghalo yomoSouth Africa
Top of a Page

Omahangano oku ninga omapako moNamibia okwa kumwa konghalo ei i li koSouth Africa yovanhu tava xwike po eenhele domangeshefelo noku nyekula oininima meefitola.

Namibia oha xupu muSouth Africa ngeenge tashi ya koipindi shaashi oinima ihapu ei hai landifwa moNamibia ohai di.

Meenghundafana a ninga naKundana omukulunhu wehangano lomafudiko Tumandje Burial Insurance Wendelinus Simon okwa hokolola ta ti omahangano aa haa ningi omafudiko moNamibia oha lande oikefa koSouth Africa omanga amwe oha lande oilongifo ngaashi oipilaki yoku ninga oikefa. Okwa ti mopaife ngaha eshi moSouth Africa muna edundakano lovanhu tava xwike po omandiki omangeshefelo nasho oshe vadenga pomutima neenghono shaashi ova xulifa po manga okukala tava mbesitele oikefa koSouth Africa, molwoo onghalo ei i li ko tai dana onghandangala.

“Ehangano letu ola ninga eenghandambala dihapu dokumbesitela oikefa ndele ka pena sha ekwafo la sha. Otwa lombwelwa opo tuteelele konima yeemwedi natu ngeenge vati onghalo ya shuna kouwa,” Simon ta ti.

Simon okwa yelifa ta ti navo ova kumwa unene koshikumungu eshi shili moSouth Africa shaashi paife ova taalela eshongo loikefa nai ya wana vali.

“Ngaashi naana tu shishi kutya otu na ombuto yoCovid-19 tai dana onghandangala moshilongo, oyo i li tai dipaa ovanhu neenghono. Mopaife ngaha omwaalu ouli pombada wovanhu va fya koCovi-19, onghee ehangano letu oha li yakula ovanhu vahapu va hala oku landa oikefa shaashi oshiwana ota shi fi unene,” Simon ta ti.

Okwa weda po ta ti ovainalonga hava longo momahango omafudiko ove na omito ya kula yoku kwatwa kombuto yoCovid-19 shaashi ohava longo nomalutu ovanhu va fya koCovid-19, vo ohava ningi nomapako keenhele dayooloka moshilongo.

Simon okwa twa oshiwana omukumo opo shi kale tashi ningi oipopiwa ixupi noya ngongwa nawa poitufi yeefya opo ovanhu va ha kale vangudumana efimbo lile. 

“Oshiwana natu twikile oku li u fa komilandu doCovid-19 efimbo keshe ngeenge tuli poitufi yeefya shaashi omukifi ou owa nyika oshiponga neenghono,” Simon
ta ti.

 


2021-07-22  Festus Hamalwa

Share on social media
Bottom of a page