Komufala wopolifi mOshikoto Commissioner Teopoline Kalompo-Nashikaku okwa kunghilila oshiwana opo shi kale tashi lopotele opolifi omahepeko omomaumbo pefimbo.
Okwa ti ovanhu nava xulife po okukala va mwena ngeenge tava ningilwa omatilifo ile tava dengwa momaumbo kovakwapata wavo ile kovaholike vavo.
Nashikaku okwa hokolola ta ti opolifi oya didilika ovanhu vamwe hava kala tava ningilwa omahepeko omomaumbo ashike kave hole okulopotela opolifi.
“Ovanhu ohava lopotela opolifi konima ngeenge a monifwa oshiponga ile ngeenge pe na oshiponga shefyo, onghee eshi oshi li sha puka,” ta ti.
Etivali loshivike eshi moshitukulwa shaShikoto omwa lopotwa oibofa ivali yomahepeko omomaumbo kombinga yovanhu va dengwa nokuningilwa omatilifo.
Omulumenhu weedula 51 okwa kwatwa po eshi a denga omukainhu weeedula 35 noikulumbwati komutwe nokeisho laye lokolumosho.
Oshiningwanima eshi osha ningilwa komukunda Olambo peendingosho England efimbo lomutenya.
Opolifi oya hokolola tai omufekelwa oha kala shito noku tuka nakuninga oshihakwa nokumuningila omatilifo kutya ote mu dipaa.
Omulumenhu weedula 24 naye okwa kwatwa po eshi vati a denga omukainhu weedula 43 komukunda Oshikulu peendingosho Okoona efimbo lokomatango.
Oovafekelwa aveshe otava holoka momhangu Etine notava pangulilwa oshibofa shomahepeko oukashike kookanhu.
Nashikaku okwa weda po ta ti oshiwana momikunda nashi kale tashi longele kumwe mokukondjifa omahepeko oukashike kookanhu.
“Ovanhu nava kale tava lopotele oovene vomikunda ile opolifi ngeenge pena omunhu ta ningilwa omahepeko oukashike kookanhu pomidingonoko davo,” ta ti.
Okwa ti opolifi mOshikoto oye li longekida efimbo keshe okukala ya kwata po ovo tava ningile ovanhu omahepeko oushike kookanhu.