New Era Newspaper

New Era Epaper
Icon Collap
...
Home / Omahooli onkene taga tsikile okundjondjelwa moshilongo

Omahooli onkene taga tsikile okundjondjelwa moshilongo

2022-05-20  Victoria Kaapanda

Omahooli onkene taga tsikile okundjondjelwa moshilongo
Top of a Page

Nonando uuministeli wiikwankondo niikwamina wa kala tau kumagidha oshigwana shi hulithe po okushingitha omahooli gokoAngola, Aanamibia onkene taya tsikile. Uuministeli otau kambadhala oku uvitha ko oshigwana kombinga yuupyakadhi omahooli ngoka taga vulu okutula oshilongo.

Sha ikwatelela kepeko lyopolisi, omukiintu gwomimvo dhopokati okwa li a adhika nomandini gomahooli  ge li 66 ngoka inaaga pitikwa moshilongo.

Taya ti omukiintu ngoka natango anuwa okwa li a mangwa nokwiifutile mo mondjedhililo sho kwa li a amangwa niikolitha inayi pitikwa moshilongoi.

Oshiningwanima shoka osha holoka momukunda gu li momudhingoloko gOniipa moshitopolwa shaShikoto.

Opolisi oya ti omandini ngoka gomahooli okwa li ga adhika momatungilo moka kwa li ta hiila nokwa li mwa adhika natango omandini gatano kaage na sha nuupakete womakaya goYes wu li 25 000.

Okwa ndhindhilikwa omahooli ngoka haga landwa unene kaahingi yootekisa oshowo mboka haya hingi oondjila oonde.

“Iipotha yi na sha neyako lyomahooli itayi ka talika ko we onga iipotha iishona notayi ka ungaungwa nayo lela neitulemo,” opolisi tayi popi ngaaka.

Tayi kumagidha oshigwana shi ikaleke kokule nokukutha ombinga miiningwanima yi li ngaaka.

Omahooli oga konekwa taga landithwa unene miitolwa yokonooli, Omusati, Oshana osho wo Ohangwena.

Opolisi omumvo gwa yi oya li ya popi kutya omahooli ngoka taga landithwa moNamibia okuza koAngola, otaga shunitha oongeshefa dhomahooli moshilongo pevi.

“Aahingi yiihauto otaya tondokele komahooli ngoka oshoka anuwa oge na ombiliha, omanga aashingithi yomahooli moshilongo itaaya landitha we,” tayi ti ngaaka.

vkaapanda@nepc.com


2022-05-20  Victoria Kaapanda

Share on social media
Bottom of a page