Lasarus Hakwaake

Esther Lusepani, Omunambelewa Omukulunhu mouministeli woukashikekookanhu, oufikepamwe, exulifepo loluhepo oshoyo onghalonawa yoshiwana Mombelewa yaPresidente okwa popya kutya ombelewa yavo oya kala nokupulwa opo i vatele moshikumungu shi na sha nomakonaakono okumona ooxe oshoyo ooina vounona (DNA testing), unene ku yambididwe ovanhu ovo ihava longo oshoyo ounona ovo itava dulu okufuta omayakulo oo.

Meenghendabala davo opo va kwashilipaleke kutya kape na umwe a anyenwa omayakulo aa afimana unene, ouministeli owa tula po oshimaliwa momutengenekwafaneko woshimaliwa wodula 2020/2021 shaneenenwa  omayakulo oo koitukulwa aishe yoshilongo, osho Lusepani ati.

Okwa weda ko ta ti, ovanambelewa vonghalonawa moitukulwa ovo ve na ovayakulwa va pumbwa omayakulo a tumbulwa ova teelelwa va ninge omakonakono omoule opo va mone ngeenge ovayakulwa ovo ova wana tuu shili oku pewa omayakulo oo. Ngeenge osha monika kutya ova wana nena omunambelewa wonghalonawa oku na oku ninga eimbilo kombelewa yakula koWindhoek taku longifwa omulandu wokulanda. Okwa popya kutya eindilo ola pumbwa nee omikanda ngaashi eindilo la shangwa nawa, ombapila yomomangu (court order), ombapila yekonakono omo ovanhu aveshe vena oku kala vatwa kumwe oshoyo eemapila doshilongo.
Ouministeli owa indila ovanambelewa vonghalonawa opo  va longife omhito ei nomayakulo aa.