Omilandu nomalandulathano ngoka ga hulu ohela oga gwedhelwa notaga tsikile ge li ngaashi ge li, okuza uusiku wonena sigo oko31 Maalitsa –ndhika odha tseyithwa komupresidente Hage Geingob sho a li ta popi noshigwana sho omasiku ngoka ga li ga gandjwa gepato ge ya pehulilo.
Geingob okwa tseyitha kutya nando omilandu ndhoka odhe ya nuumvo nonando pwa gwedha dhimwe.
Namibia okwa ndhindhilikwa nawa mokukondolola omukithi gwoCovid-19, nonando a kanitha oomwenyo dhaantu dhi li 411.
“Otatu pandula China sho u uvaneke oshiwike sha zi ko kutya, ote ke tu yambidhidha nuukende womiti 100 000 omanga India u uvaneke okuyambidhidha nuukende womiti wu li 30 000,” ta ti ngaaka.
Presidente okwa popi ta ti, omanga omiti ndhoka inaadhi thika moNamibia, omilandu nomalandulathano gwo kukeelela omukithi gwocorona gu taandele, ogo ashike tatu ikololele mudho.
“Ondu uvite ko kutya amuhe omwa hala okushuna konkalo mwa kala nayo, kaayi na oompango dhokukeelela iilonga yeni yakehe siku yi ye komeho, ihe shika otatu shi ningi okukeelela nokugamena oomwenyo dhAanamibia ayehe,” Geingob a fatulula.
Minista guundjolowele nonkalonawa Kalumbi Shangula okwa ti, omukithi gwoCovid-19 ogwa lopotwa tagu yi pombanda moosikola.
“Uuministeli owu li metifa okukondolola onkalo moosikola, onkene aanasikola ye li momihandjo, itaya ka pitikwa we oku ka talela po komagumbo,” Shagula ta ti ngaaka.
Minista okwa kumagidha aanasikola ya tsikile okugwanitha po omalandulathano agehe okukeelela omukithi gu taandele
Ta popi ta ti, iigongi tayi ningilwa meni lyongulu yontumba, nayi kale ashike oowili mbali.
Okwa gwedha po kutya oowili dhokangendjo kuusiku otadhi tsikile okuza po 22h00 sigo 04h00 yokoongulasha.
“Oongeshefa nadhi tsikile okulonga sha ikolelela kepitiko lyoombapila dhawo dhomangeshefelo, ihe oompango nomalandulathano naga gwanithe po, ‘’ ta popi ngaaka.
Ta ti, oondingosho otadhi tsikile okupata pohetatu. Omahala gwomayimweneneno ngaashi oohotela oga pitikwa okulanditha omalovu mOosoondaha,” ta ti ngaaka.
Shangula okwa ti Namibia oku li metifa okulongekidha omiti dhokukeelela omukithi gwocorona.
”Omasiku omashona twa taalela, omiti otadhi kala dha thika moshilongo, onkene oshigwana otashi kumagidhwa shi taambeko okulongitha omiti dhoka,” ta kumagidha.