New Era Newspaper

New Era Epaper
Icon Collap
...
Home / Omalelo gopamithigululwakalo oga kanitha omwiinekelwa - Iipumbu

Omalelo gopamithigululwakalo oga kanitha omwiinekelwa - Iipumbu

2021-07-23  Victoria Kaapanda

Omalelo gopamithigululwakalo oga kanitha omwiinekelwa - Iipumbu

“Onkundana ndjika oya thigi ndje nomwenyo gwa ziyalala sigo onena, Mutinenge Kisco  Liswani III, okwali omuleli omwiinekelwa omugandji nomupukululi. Otwa kanitha epanda,”

Ndhoka odha popiwa komunashipundi gwomalelo gwopamuthigululwakalo Herman Ndilimani Iipumbu, sho a li a kundana eso lyelenga enene lyaMasubia moshitopolwa shaZambezi. 

Luswani ngoka a lele Aamasubia omimvo 30, okwa si omasiku omashona konima yomaso gaakwaniilwa nomalenga ogendji, mwa kwatelwa omuleli gwomuhoko gwOvaherero Vekuiii Rukoro naKilus Nguvauva gwOvambanderu mboka opo ya fumbikwa.

Iipumbu ta ti, omvo nguka oya kanitha aaleli oyendji, oku pitila mo maso gayooloka, nuunene oga etithwa komukithi gwoCovid-19. Luswani okwali gumwe gomomalenga omanene. ”Otandi dhimbulukwa sho a li a ka kalela po Namibia koSADC, onga gumwe gwoomaleli yopamuthigululwakalo yaNamibia, Iipumbu ta popi ngaaka.

Ta ti, Namibia oshowo omalelo gwopamuthigululwakalo oga kanitha omuleli omwaanawa, omunandunge oshowo omulongi. Omwenyo gwe nagu vululukwe mombili.

Ndilimani okwa ti, oshilongo osha ponokelwa komukithi tagu mana po aantu, onkene otaku magidha oshigwana shi itulemo momalombwelo nomalandulathano gwoku kondolola omukithi ngoka.

“Ondali nda yemata esiku kwali ndaka tuntilwa kOshikuku, thimbo ndiya taku ti omiti odha pwa mo moshilongo, ihe onda li nda adha ko aantu kaaye vulithe pu yatano, nomiti ondumba,” ta popi ngaaka.

Ta ti, shoka otashi ulike kutya oshigwana momidhingoloko ka shina natango ontseyo yoku tuntilwa.

“Otandi kumagidha kehe ngoka ta taandelitha omauyelele giifundja kutya omiti dhoka odhina oshilanduli oshiwinayi, eshi hulithe po,” ta popi ngaaka. Ta kumagidha kehe gumwe a ka tuntilwe, opo a kale a gamanwa.

“Oshike muna uumbanda woku tuntilwa, ihe ka muna uumbanda wokwiipatela momahala gomanwino, muli mo omundji, mpoka omukithi ngoka hagu taandele mbala,” ta pula ngaaka. Ndilimani ta ti, oku tuntilwa hapo kwa tameke, onkene ngeno okwali haku dhipaga aantu ngeno oyendji oya sa nale ko ku tuntilwa.

“Onda hala okuyelitha kutya okutuntilwa itaku thiminikwa omuntu, ihe okwaa ngoka a hogolola etokolo lyomondjila,” ta fatulula ngaaka. Ndilimani okwali a gandja oshi holelwa kutya, aantu sho ya kala haya alukwa, oya kala haya pewa omiti, kaape na ontseyo yomiti dhoka ihe ohadhi longithwa, ito aluka.

Ta ti, onkene natu kaleni tuna eitaalo maanongononi oshowo mwaa mboka yena ontseyo yo miti dhoka dhoku shonopaleka ompito yoku kwatwa ko mukithi gwoCovid-19.


2021-07-23  Victoria Kaapanda

Share on social media