ONGWDIVA - Opolisi monooli otayi kumagidha aakwashigwana ya hulithe po okupititha oshowo okulanditha omalovu, ngashi sha indikwa komuPresidente Hage Geingop pethimbo ndika lyepato, okukeelela omukithi gwo Covid-19.
Omalovu oga ningwa ongeshefa yomeholamo momagumbo ogendji monooli, nonando oyendji ohaya kwatwa kopolisi ohaya pewa eyifutilemo ethimbo ndyoka.

Opolisi oya li ya ndhindhilike kutya omalovu ohaga pitithwa okuza moodepo dhi na oositoka dhomalovu ogendji oshowo mumini waaIndia.
Omupopiliko gwopolisi moshitopolwa shaShana Thomas Aiyambo okwa ti mboka taya teya oompango dha tulwa po naya pewe egeelo lya gwana opo ya ninge iiholelwa yayakwawo kaaye shi ninge wo.

Ta ti, kehe gumwe paife, oku uvite ko kutya omalovu oga indikwa ethimbo ndika. Ihe natango otaya landitha ashike omalovu meholamo, oshigwana nashi uve ko kutya shoka tashi kondjithwa, okukeelela omukithi gwoCovid-19.
“Oshigwana nashi longele kumwe nopolosi, kehe mpoka pe na omalovu taga landithwa konima yomagumbo meholamo, naya lopotele opolisi yopopepi,” Aiyambo ta ti ngaaka.

Aiyambo okwa ti Osoondaha ya zi ko, omupevikuluntu gwokamini ta ka ithanwa Rani  mOngwediva, opamwe naanilonga yamwe, oya li ya kwatwa po kopolisi sho ya li ya adhika taya landitha omalovu omalulu kaakwashigwana.
Omugandjimulombo moshitopolwa shaMusati Lineekela Shikongo okwa ti Etitano lyoshiwike sha zi ko, opolisi oya li ya manga po ongundu yaantu ya pita pomulongo, mboka kwa li ya gongala pegumbo tali landithwa omalovu molukanda Kasikili mOutapi.

“Sho kwa li twa ningi omapekaapeko, egumbo ndyoka okwa li tali ulike lya ningwa po ondingosho yomalovu. Okwa li twa adha mo omalovu gwongushu N$ 22 000,” Shikongo a popi ngaaka. Oohauto dhi li ine, ndhoka kwa li dha adhika pehala mpoka, odha li dha kwatwa po ethimbo ndyoka nokonima odha ka gandjwa kooyene.

Ayehe mboka kwa Ii ya mangwa po oya li ya pewa ya ifutile mo N$2 000 kehe gumwe, omanga mwene gwongeshefa a  ifutila mo N$4 000.
Shikongo okwa li wo a kumagidha  aashingithi yomalovu meholamo oshowo konima yomakuma, opo ye shi hulithe po oshoka osha indikwa pethimbo ndika omolwa oCovid-19.  

“Mboka taya landa omalovu pethimbo ndika, naye shi hulithe po yo naya simaneke omalombwelo oshowo omilandu dha tulwa po. Omangundumano ngoka taga keelelwa oshowo oku ipitithapo ehala pokati kaantu yaali naku simanekwe,” Shikongo a popi ngaaka.
Shikongo naye okwa li a ndile moshigwana opo shi longele kumwe, sho shi simaneke nokulandula omilandu dha tulwapo, opo omukithi gwoCovid-19 ngoka gwa nika oshiponga  opo gu shonopale oshowo gu hule po.