Minista gwuunamapya Calle Schlettwein okwa ti, aalandithi yonyama, otaya ka patulula omangeshefelo gawo okuza petameko lyaMaalitsa nuumvo.
Minista dhoka okwa li edhi popi, oshiwike sha ziko, sho kwa li ta gandja uyelele kombinga yepato lyoongeshefa dhonyama omolwa omukithi gwekondo nelaka, kOmuthiya.
“Oshipotha sho tango shomukithi gwekondo nelaka okwa li sha monika lopokati koshitopolwa shaZambezi noKavango kokUuziilo, shoka kwa li sha lopotwa konima yoomwedhi ndatu, sho oshipotha shimwe sha ka monika natango moshitopolwa shaShikoto,” Schlettwein ta popi ngaaka.
Ta ti, omukithi ngoka ogwa taandela kiitopolwa ayihe yomonooli, Oshana, Oshikoto, Ohangwena, Omusati oshowo ombinga yimwe yaKunene.
“Aakalimo naya kambadhale okufala iimuna yika pewe omiti ngele aanambelelwa yuuministeli wuunamapya yathiki miitopolwa ya wo, okukeelela omukithi ngoka,” ta ti ngaaka.
Ta gwedha po ta ti, omayinyengo giimuna oga indikwa manga ethimbo ndika,
kehe ngoka ta kaadhika ena onyama nenge oshimuna otaka pewa egeelo.
“Koshitopolwa shaZambezi iimuna tayi longekidhilwa onyama oya pitikwa , ihe opena omilandu dhina okulandulwa. Imuna tayi zi komikunda dha monika omukithi gwekondo nelaka inayi pitikwa okweenda nenge okudhipagwa,” ta fatulula ngaaka.
Schlettwein okwa ti, aapolisi omoyeli moopate ya ninga oomboloka, oku gwanitha po omalandulathano agehe okukeelela omukithi ngoka.
Minista okwa kwashilipaleke kutya omangeshefelo go kapana, otaga tsikile konima omukithi nguka gwa tipo hwepo.
Pethimbo ndika iipotha otayi lopotwa ya uka pombanga miitopolwa yokonooli.
Omushingithi gwiimuna mOshakati Johannes Tileinge okwa ti, omukithi ngoka ogwa shunitha omangeshefelo gawo konima.
“Opo twa tameke omalandithilo getu, sho kwa li twa pata omolwa omukithi gwocorona, nena otwa pata ishiwe omolwa omukithi gwekondo nelaka, oshi li ota tu mono iihuna,” Tileinge ta popi ngaaka.
Ta ti, ongeshefa ye oya patele muJanuary, paife omwedhi gumwe inaalonga, mo omo ha hupile, okukwathela aanegumbo ye.
Tileinge okwa ti, ngele opena omiti nenge oowenda dho kukeelela omukithi ngoka, nadhi tulwe miilonga mbala, opo ya tsikile okulanditha, oshoka momagumbo otaya sile mo ondjala.