WINDHOKE-Miss Totem Expo ethigathano ndyoka lya kala nokudhana onkandangala uule woomvula dha piti, nolya kala nokunana engathithi lyuukadhona uushona mboka wu li dhingi moku enda, nelalakano lyokusindana oshikoloni shika. 

Aalongekidhi yooshiindingili shika moka mwa kwatelwa elelo lyaShakati pamwe nOkashipu Investment CC ndyoka ya kala nokulongekidha oshiindingili shika oya tseyitha kutya otaya kongo uukadhona dhingi moku enda opo wu ka kuthe ombinga methigathano lyomvula ndjika, opo ya ka sindane oshindji, yo ya kale aakalelipo yomaulikilo giipindi ngaka. 

Miss Totem Expo okwa egulukila uukadhona awuhe womoshilongo, nonuumvo okwa hala uukadhona mboka wuna ondjelo ombwaanawa wuli pokati koomvula 18 sigo 24, wo wu kale wu na omuthika gu thike poometa 1.68 opo wu vule okukutha ombinga. 

Oofooloma dhokukutha ombinga otadhi adhika pombelelwa yelelo lyaShakati, nakehe yimwe oyin a ooN$100.  Omaishangitho ngaka otaga hulu momasiku 19 Apilili.

Ethigathano ndika olya etwa po komaulikilo giipindi goShakati Totem Expo, ngoka ge li taga taandelitha omithigululwakalo dhomoshilongo, nokuhumitha eliko lyoshilongo pombanda. 

Omauliko giipindi ngaka ohaga etelele aauliki yiiyetwa po yawo oyindji okuza muNamibia alihe, osho woo omainyanyudho ga kwata miiti okuza kaahikingalo moshilongo.
Ethigathano lyaMiss Totem Expo ohali ningwa kehe omvula pokati ka Mai naJuni, okutothamo omanzuna ngoka taga kalele po oshiindingili shika, hashi ningwa ishewe nelalakano lyokuyambula po iitalenti yoku enda unene kaadhana aagundjuka.