Uupyakadhi wiipotha hayi undulilwa komeho iikando oyindji moompanglilo dhokonooli omolwaapanguli inaaya gwana, ogwa tula monima iilonga yoohahende, aayeti yiihokolola, aanambelwa oshowo aakonaakoni yiipotha.
Uupyakdhi mboka owa li wa etwa puuyelele kaaniilonga mompangulilo yopevi mOshakati sho kwa li ye ya okutalelwa po kaanambelewa aakuluntu muuministeli wuuyuki mEtitatu.
Osheendo shoka okwa li sha hala wo oku uva omaupyakadhi gawo, nosha li shi na minista guuyuki Yvonne Dausab oshowo omukuluntu guuyuki Petrus Shivute naanambelewa aanene moshikondo shoka.
Omukuluntu gwopolisi moshitopolwa shaShana Rauha Amwele okwa li a totha mo omaupyakadhi ga taalela opolisi.
“Omapeko otaga kana moshitopolwa shaShana kaage shiwike kutya oga ya peni, omanga iipotha ngele ya tumwa koompangu, ohayi kwata ethimbo nuule okugaluka nokukutha onkatu ya hugunina,” ta popi ngaaka.
Omupanguli Mikka Namweya okwa li a popi ta ti, olundji hayo haya kalitha ko iipotha mbyoka, ihe ohaya kala taya kongo uushili womahokololo,” a popi ngaaka.
Namweya okwa li a yelitha kutya ita ti, iipotha ihayi kana, ihe okwa li a lopotelwa omapeko gamwe ga li ga adhika mombelewa yomukuluntufaliveta gumwe, kokutya ethimbo limwe uupyakadhi ohau zi pomahala mpoka ga pungulwa. Omukuluntu gwompangu ya kalela po oshitopolwa mompangulilo yopevi Nelao yaFrans, okwa li a popi uupyakadhi a ningi ethimbo nawo, sho ya kala kaaye na omupanguli, naashoka osho sha kala tashi undulilitha iipotha komeho. “Omupanguli ngoka e li po paife, oha longo koompangulilo mbali mOshakati nokEenhana. Mboka owo uupyakadhi unene, oshoka ita vulu okupangula nokumana niipotha ayihe moshiwike shimwe,” yaFrans a popi ngaaka.
Uuministeli wuuyuuki owa li wa yamukula ethimbo ndyoka, kutya uupyakadhi mboka otawu ya pehulilo, sho taya ka tuma aapanguli koondoolopa adhihe dhi na oompangulilo dhopashitoplwa, opo uupyakadhi mboka wu ye pehulilo. Omupanguli gwomompangulilo yaShakati ota ka tameka iilonga momasiku 01 Mai nuumvo.
Hahende gumwe edhina lye li shiwike kuKundana okwa li a popi ta ti, natango oye na uupyakadhi womakwatathano moombelewa dhawo. “Aantu yamwe ohaya zi kokule, komaluhwa, ethimbo limwe sho taya ka thika huka, otaya lombwelwa kutya oshipotha osha undulilwa komeho, oshoka omupanguli ke po. Oshihwepo aantu mboka ya kale taya lombwelwa pangodhi opo kaaya hepithe ethimbo lyawo niimaliwa,” ta ti ngaaka.
Ta popi ta ti, shoka ohashi teya po omukumo gwaakalelipo, ya kale itaaya thiki we kompangu.
Uuministeli wuuyuuki owa ti, oshigwana oshi na okukala shi na uuthemba kuuyuki, ihe shika otashi holoka uuna tashi wu ulikilwa.