New Era Newspaper

Icon Collap
...
Home / Omaso moMusati gu uka pombanda

Omaso moMusati gu uka pombanda

2021-04-27  Victoria Kaapanda

Omaso moMusati gu uka pombanda
Top of a Page

Nonando okukala po kwopolisi moshitopolwa shaMusati she eta iimbuluma yi shune pevi moshitopolwa moka okuza omumvo gwa yi, okwa kundanekwa omadhipago nomaikuthomwenyo  oshowo omaso gwombaadhilila gu uka lela pombanda.

Omaso moshitopolwa moka oga uka lela pombanda, ngele kehe esiku inamu lopotwa eso lyomuntu, okonima yomasiku gaali.

Oyendji otaya pula komalungula kutya uupyakadhi owu li lela peni, oshike aantu inaya simaneka omwenyo gwomuntu omukwawo.

Nonando oshidhigu okukeelela omahepekathano gwomomagumbo.

Yamwe okwa li ya gandja omayele kutya pamwe omwa pumbwa osenda yaahungimwenyo moshitopolwa, ndjoka tayi kala tayi gandja omalongo oshowo eputuko lyomomagumbo nankene ye na okutaamba ko nokukandula po omawupyakadhi ga yooloka.

Omukuluntu gwopolisi moshitopolwa shaMusati Titus Shikongo okwa ti, opolisi ohayi kambadhala aluhe okukwathela oshigwana shi lopote aluhe omawupyakadhi taya iyadha mugo, peha lyokwiikuthila ooveta miikaha yawo yene. Mehuliloshiwike omwa lopotwa omadhipago  gaali. 

Shikongo okwa ti, omulumentu gwomimvo 22 okwa li a tsuwa noombele komumwayinagona gwomimvo 38, sho ya li taya tsu oombata kutya olye a enda tango kuushimba. Oshiningwanima shoka osha holoka momukunda Omufituwanawuyala momudhingoloko Anamulenge lwopotundi 23h00 mOlyomakaya.

“Aalumentu mboka oya li ya tameke okunyenyeta sigo gumwe a tsu mukwawo nombele metundji. Sho a thiki koshipangelo okwa hulitha nale,” ta ti ngaaka. 

Nakusa okwa tseyika nedhina Fillemon Usko Ndeshimona.

Esiku olyo tuu ndyoka, olutu lwomusamane gwomimvo 52 olwa li lwa adhika kooha dhopate lwa tsuwa noombele. Olutu olwa li lwa itsuwa komulumentu gumwe ngoka a li ta piti po. “Shoka sha  eta edhipago inashi shiwika natango nonando nakufekelwa okwa mangwa po, nomakonakono gwopolisi oge li metifa,” Shikongo ta ti ngaaka. Otaku hokololwa kutya olutu ndoka okwali lwa itsuwa lwopotundi 23h00 mOshikuku.

Nakusa okwa tseyika nedhina Joseph Neumbo. Aakwanezimo oya tseyithilwa.

Moshiningwanima inaashi faathana omukiintu gwomimvo 38 okwa dhipagwa  sho a tetwa omunino kukuume ke komiihole gwomimvo 30. Sha ikwatelela kepeko lyopolisi, oshininwanima osha holoka  uusiku wOlyomakaya ga zi ko momukunda Elavi-B moshitopolwa shaShikoto.

Otaku hokololwa kutya aaholike mboka okwa li ya zi  koondingosho taya nyenyeta sigo omegumbo.

Nakusa anuwa okwa li a tondoka po , ihe kuume ke komiihole okwa li e mu tidha sigo omepya moka e mu dhipagele.

Nakusa okwa tseyika nedhina Eveline Matua. Aakwanezimo oya tseyithilwa nomakonaakono gopolisi oge li metifa.


2021-04-27  Victoria Kaapanda

Share on social media
Bottom of a page