Victoria Kaapanda

Omatala ngoka taga longwa noshimaliwa shi thike pomilliona yimwe, moshitopolwa shaMusati oga tegelelwa okupwa okulongwa kehulilo lyomwedhi nguka.

Ali Dhrarani goRani Group, okwa popi kutya oya nyanyukwa oshoka oya pondola okuninga shoka kwa li ya uvanekela oshigwana, kutya otashi ka za mo momapandaanda shi mone omahala gokulandithila.

“Otashi nyanyundha okutala omatala ga thikama, nelalakano lyokuningila oshigwana uuwanawa,’’ ta ti ngaaka.

Omatala ngoka taga ka kala haga longithwa kukehe omulandithi gomomapandaanda, otaga ka kala ge li paali.

Omatala gotango otaga kala ge na uutala wu li 86, kongushu N$600 000 omanga ngoka omatiyali taga tungwa nuutala 70 kongushu N$400 000.

Omatala ngoka ngele ga pu, otaga ka gandjwa miikaha yelelo lyondoolopa lyOkahao, opo aalandithi ya mone oompito dhuutala wokulanditha, shi vulithe okulanditha momapandaanda.

Otaku hokololwa kutya omatala ngoka oga gwedha omakwawo, okuhila aalandithi yomomapandaanda, ya mone omahala gawo ga yela oshowo okuyanda okutidhwa pomiyelo dhoositola dhaantu Aalandithi yomomapandaanda okwa li ya ningilwa oshigongi oomwedhi dha yi, noyendji yomuyo okwa li ya itaala noya li ya ulike ohokwe yoku ka landithila komatala.

Nonando yamwe ya itaala, yamwe natango oya kala momapandaanda  omolwomatompelo gi ili nogi ili.

Omugandji gwomauyelele melelo lyondoolopa lyaKahao Victoria Haihambo okwa popile ta ti, omatala gokulandithila omo ge li ga gwana mOkahao.

“Otu na omatala ge li patatu, ngoka taga vulu okugandja omahala gokulandithila kaalandithi ayehe yomomapandaanda,” ta ti gaaka.

Ta ti oyendji otaya gandja omatompelo kutya komatala kaku na ookasitoma, onkene ohaye ya okutentena ookasitoma pomiyelo dhoositola. 

“Ohatu mono ishiwe omanyenyeto okuza kooyene dhoositola, kutya inaya nyanyukilwa aantu mboka taya landitha komeho goositola dhawo, oshoka ookasitoma dhawo opo ashike hadhi hulile,” ta ti ngaaka.

Haihambo ta gwedha po kutya omahala ngoka oge na uundjugo nomeya nohaya pulwa ashike okufuta N$42 komwedhi.