New Era Newspaper

New Era Epaper
Icon Collap
...
Home / Omateyo gomagumbo ga indjipala moshilongo

Omateyo gomagumbo ga indjipala moshilongo

2022-05-31  Victoria Kaapanda

Omateyo gomagumbo ga indjipala moshilongo
Top of a Page

Opolisi oya ndhindhilike eyindjipalo lyomateyo gomagumbo, moka mwa kwatelwa omakwato koonkondo, omadhipago oshowo omahepeko galwe haga ningilwa mboka haya adhika momagumbo.

Opolisi oya ti, aafuthi otaya ponokele omagumbo gaantu unene ethimbo lyomutenya omanga ooyene ye li kiilonga.

Sha ikolela kepeko lyopolisi yiiningwanima yomehuliloshiwike, aalumentu ye li yatatu okwa li ya mangwa sho ya li ya yi ontuku konima ya li ponokele ehala limwe mOndangwa moshanga shomutenya.

Otaku hokololwa kutya aalumentu yane okwa li ya ponokele mehala lyimwe kOlunkono, sho ya li ya konkola omweelo gwoshitenda tango nokupatululwa komukeeleli gomaliko.

“Aalumentu mboka okwa li ya mbulukutile omukeeleli gomaliko noku mu manga, oya li ya tsikile okumanga aaniilonga ya li mehala moka, e taya ka teya egumbo lyAachina mboka kaaya li mo ethimbo ndyoka,” tayi hokolola ngaaka.

Opolisi tayi ti, aalumentu mboka okwa li ya kutha mo otv, oongodhi dhopeke oshowo iimaliwa N$8 000.

Otaku hokololwa kutya aalumentu mboka okwa li ya ka mangelwa kolukanda Ontinda momundhingoloko Okaku mOndangwa.

“Iinima ayihe kwa li ya yugu megumbo moka okwa li ya monika, omanga etata lyoshimaliwa shoka kakwa li lya monika. Omuhingi gohauto okwa li a matuka po, ihe ohauto oya kwatwa ko kopolisi,” ta yi hokolola ngaaka.

Natango momukunda Enkono mOndangwa, aafuthi okwa li ya yi ontuku niinima yongushu N$150 000.

Opolisi oya ti, aafuthi mboka okwa li ya ponokele egumbo ndyoka moshanga shomutenya, noya li ya yi nohauto yoToyota Hilux ndyoka ya li yaadhika kOkamwandi kaNandjokwe mOndangwa.

Opolisi moshitopolwa shErongo oyi li molukongo lwaalumentu ye li yatatu mboka ya li ya ponokele ehala tali ithawa Etango Logistics Services Etitano.

Otaku hokololwa kutya aafuthi mboka okwa li yu ulike aaniilonga yaali oondjembo, taya pula iimaliwa noongodhi dhawo dhopeke.

Tayi ti, oshiningwanima shoka okwa li sha holoka po 17h00. 

Opolisi oya ti, aaniilonga okwa li ya yugwa iimaliwa N$500 kehe gumwe, oongodhi dhopeke oshowo okompiyuta yopeke.

Aafuthi mboka anuwa okwa li ya yaka po ohauto ndjoka kwa li ya paakinga pehala mpoka nokwa li ye yi thigi mepandaanda enene lyoIndependence Avenue moKuisebmond.

Sigo oompaka kape na ngoka a mangwa.

Opolisi otayi kumagidha oshigwana shi kale aluhe mekwatathano nopolisi uuna iiningwanima mbyoka tayi holoka, oshowo momagumbo mu kale aantu ethimbo lyomutenya.

Tayi indile oshigwana shi ikaleke okulanda iinima tayi landithwa momapandaanda.

– vkaapanda@nepc.com.na


2022-05-31  Victoria Kaapanda

Share on social media
Bottom of a page