Omauliko giipindi ngoka haga kala ko omumvo kehe mOndangwa, omumvo tagu ya oga tengenekwa taga ka kala ko momasiku 02 sigo 06 gaMai.

Omawuliko giipindi ngoka omimvo dha piti oga li ga kalekwa, omolwomukithi gwoCovid-19.

Omupopiliko melelo lyondoolopa yaNdangwa Petrina Shitalangaho okwa ti nonando omukithi ngoka natango omo gu li mokati ketu, omauliko giipindi otaga ka ningwa mesimaneko lyoompango nomalandulathano gwokukeelela omukithi ngoka.

Ta ti omauliko giipindi ngoka ga kala neyithano lyokuningwa omumvo kehe, otaga ka kala ga yooloka komakwawo ga holoka nale.

“Omaindilo gomahala gomangeshefelo oga patuluka nakehe gumwe okwa manguluka okuthika poombelewa opo a udhithe oofooloma dhokuninga omaindilo,” ta ti ngaaka.

Omawuliko giipindi mOndangwa okwa li ga patuluka lwotango omimvo 10 dha piti.

“Elalakano lyetu okugalula eliko lyoshimaliwa ndyoka lya gu pevi oshowo okugalula oongeshefa ndhoka dha li dha pata,” Shitalangaho ta ti ngaaka.

Ta ti, omawuliko giipindi mOndangwa, ompito ombwaanawa kaanangeshefa oshowo komahangano ga yooloka, oku ulika uunongo niilonga oshowo okushingitha iilandandithomwa yawo.

“Iipindi mbyoka ohayi gongaleke aanangeshefa oshowo aantu ya za kokule, taya ulikilathana uunongo niilonga yawo, mehala limwe,” ta popi ngaaka.

Shitalangaho okwa ti, omumvo ta guyu ya oya tengeneka okukala ye na aawuliki yiipindi oyendji lela, okuza koombinga noombinga.

Ta ti, elalakano okugandja ompito kaanangeshefa oshowo komahangano gu ulike iishingithomwa yawo oshowo okugalula eliko mondoolopa yaNgwediva.

Omawuliko giipindi otaga ka ulika iilandithomwa ayihe okuza kiikulya, kiizalomwa nakehe shoka hashi vulu oku etwa po noonyala oshowo oku eta oombelewa hadhi gandja omayakulo ga pumba popepi. vkaapanda@nepc.com.na