New Era Newspaper

New Era Epaper
Icon Collap
...
Home / Omauliko giipindi kOpuwo oge li metifa

Omauliko giipindi kOpuwo oge li metifa

2024-05-30  Correspondent

Omauliko giipindi kOpuwo oge li metifa

Omauliko giipindi yokOpuwo oga thiki mesiku eti-10 mEtitatu, nokwa longekidhwa embwinda lyiingadhalwa ya yooloka pehala lyomangeshefelo gaayehe mondoolopa moka. Omauliko giipindi ngaka otaga ningwa oshikando oshi-11, taga unganekwa kOpuwo Town Council’s Trade Fair Society kohi yoshipalonyolo ‘Eyambulepo lyiipindi, omaudhano noompito dhomangeshefelo okupitila muutekinologi’. Oshiindingili shika osha li sha patulula omiyelo nokutaamba ko oshigwana mOmaandaha ga zi ko, notashi gandja ompito ombwaanawa kwaayehe nomayinyanyudho oga kwatela mo omaudhano ngaashi omathigathano goonkambe ndhoka dha za koshitopolwa shaMaheke naKunene.

 Mayola gwaPuwo Rosa Mbinge-Tjeundo ngoka a li a patulula oshiindingili shika shuule womasiku 14, ota ti otashi gandja oshiholelwa oshiwanawa melongitho lyuutekinolohi muuyuni wongolo.

Omauliko giipindi ngaka oga li ga waiyiminwa kukuume kawo miilonga, omukuluntu gwoNational Planning Commission Obeth Kandjoze, ngoka a ti oshiindingili shika osha kala sha tata sha indula muule woomvula omugoyi.

“Sho twa tameke, osha li oshinima shanathangwa. Ngashiingeyi ope na euliko lyomuthigululwakalo, nkene aantu haya hupu, eliko lyomoshitopolwa, osho wo uupashiyoni,” ta popi ngaaka manga ta dhenge omuthindo gwesimano lyuunamapya nuuniimuna. Kandjoze okwa ti wo omauliko ngaka oga eta wo eliko lyoshitopolwa lyi ye pombanda, moka mu na aanangeshefa ya za koTanzania naSouth Africa.

Kandjoze okwa li wo a popi kombinga yopoloyeka yoGreen Hydrogen, ndjoka ya tegelelwa yi ka yambule po onkalo yoyendji moshitopolwa shaKunene. Okwa dhenge omuthindo omunene kutya opoloyeka otayi eta po oompito dhiilonga, notayi ka pitika Namibia a ka kale a ithikamena po kuye mwene ngele otashi ya koshimpungu shiinkwankondo.

Aauliki yiipindi omwa kwatelwa iikondo yepangelo, naambyoka ya yama kepangelo osho wo aakelelipo yoshikondo shopaumwene nomangeshefelo. Mbinge-Tjeundo okwa li a koleke kutya ope na aakuthimbinga ya konda po134, mboka taya ulike iilongomwa yawo, osho wo omayakulo ya nunina oshigwana. 

Okwa li wo a indile oshigwana shi taambe ko elunduluko tali etwa kuutekinolohi miikondo ya yooloka ngaashi yomangeshefelo, omaudhano osho wo eyambulepo lyeliko.

“Omauliko giipindi ngaka naga pale ondjila ya yela nawa yelongelokumwe pokati koshigwana naanangeshefa opo ku adhike onakuyiwa kamana,” Mayola ta ti ngaaka.

-Nampa 


2024-05-30  Correspondent

Share on social media