New Era Newspaper

New Era Epaper
Icon Collap
...
Home / Omavyulonghalo a taalela omashongo ahapu

Omavyulonghalo a taalela omashongo ahapu

2021-06-07  Festus Hamalwa

Omavyulonghalo a taalela omashongo ahapu

Okwa didilikwa omavyulonghalo moshilongo eli a taalela omashongo ahapu neenghono unene tuu pefimbo eli lombuto yoCovid19 sha tukuka mounyuni.

Meenghundafana a ninga naKundana komufala woshikondo shomavyulonghalo Raphael Hamunyela okwa hokolola ta ti oshikondo shomavyulonghalo moshilongo oshili sha taalela omashongo ahapu.

Hamunyela okwa ti omavyulonghalo ahapu kayena vali onhele yokukala ovanadolongo shaashi omavyulonghalo oku yadi unene ovanhu.

Okwa ti unene tuu evyulonghalo lomOluno olo limwe ladidilikwa liyana eembete dokunangala shaashi olili hali tuminwa ovanadolongo vahupu.

 “Ovanadolongo vahapu ohava nangala pedu mopaife ngaha shaashi kapenasha vali eembete devawanena, onghee eshi oshili oupyakadi wakula komavyulonghalo ahapu,” Hamanyela ta ti.

Komufala okwa hokolola ta ti eshongo likwao vali lili talidana onghandangala olo vanhu ngeenge teva uya okutalela po ovakwapata vavo a va veli meedolongo, okwa didilikwa hava etele ovanadolongo oingangamwifi, eengodi dopeke, oimbudi yanyika oulodi nosho tuu oinima ikwao ei ina yi pumbiwa okukala ya pewa ovanadolongo. “Shikwao vali twa didilika oupyakadi wovakwapata iha ve uya okutalela po eefamili davo edi dili momavyulonghalo, onghee eshi oshili ha shipe ovanambelewa a va hava longo novanhu a va veli meedolongo. Shaashi omunhu umwe nyee ngaa aile modolongo a talelwe po kovakwapata vaye,” Hamunyela ta ti. Onghee komufala okwa kunghulila oshiwana opo shikale tashi talele po ovakwapata vavo a va veli meedolongo.

Hamunyela okwa popya yoo vali komaliumbato ovanadolongo ta ti, ovanadolongo ita veli umbata nawa tuu nande. “Ovanadolongo otava tuku ovanailonga, voo tava teya po oilongifo ngaashi omapoto oundjuu, oipundi, oupomba vomeva ova teyolwashi kovanadolongo,” Hamunyela ta ti. Komufala okwa ti oshikondo shamavyulonghalo osha faneka opo shikale sha tunga omavyulonghalo ahapu moshilongo.

Okwa ti evyulonghalo limwe otali ka tungwa pokati kEenhana nokOngo moshitukulwa shaHangwena, omanga likwao otali ka tungwa mOutapi moshitukulwa shaMusati.

Komufala okwa kunghulila oshiwana opo shixulife po okutwalela ovanadolongo oingangamwifi shaashi oshili shanyika oshiponga.

“Onda pandula omavyulonghalo eshi taa twikile nokulonga oikulya yavo vo vene, onghee eshi oshili shafimana shaashi ovanadolongo ka vena omhumbwe yoikulya,” Hamunyela ta ti.


2021-06-07  Festus Hamalwa

Share on social media