New Era Newspaper

New Era Epaper
Icon Collap
...
Home / Ombaye tayi patwa … Oshilongo tashi taagulukile koshiluku oshititatu

Ombaye tayi patwa … Oshilongo tashi taagulukile koshiluku oshititatu

2020-05-29  Loide Jason

Ombaye tayi patwa … Oshilongo tashi taagulukile koshiluku oshititatu

Omupresidente gwoshilongo Hage Geingob okwa tseyitha kutya ngashiingeyi  iitopolwa ayihe 14 otayi katukile koshiluku oshititatu shepato shoka sha tulwa po mokukondjitha omukithi gwoCovid-19. Nonando ongawo, oWalvis Bay otayi ka pata thiluthilu.
Walvis Bay ota shuna koshiluku shotango hoka ta ka kala kohi yepato uule woshiwike okutameka 2 Juni sigo 8 Juni 2020.
Ndhika omupresidente okwe dhi popi omanga a li ta gandja omulombo gwepangelo kombinga yomukithi gwoCovid-19 ohela kegumbo lyepangelo mOvenduka.

Okwa hokolola kutya ngashiingeyi Ombaye otayi ka kala ya patwa, itamu ya omuntu mo itamu ziwa, kakale kaaniilonga mboka ya simana taya longo iilonga yosheendelela ngaashi aapolisi, aapangi noshowo aahingi yomaloli giipumbiwa yonkalamwenyo, yo woo aantu otaya kala momagumbo.

Omupresidente okwa li woo a pula aanambelewa yopolisi noshowo etanga lyegameno ya kale ya ihumbatela aakwashigwana nawa, ihe haku ya ngwandjagula pethimbo ndyoka lyepato koshitopolwa shoka.
Moshiluku moka, oongeshefa dhilwe mwa kwatelwa oondingosho noshowo omahala gokulila otadhi ka patuluka ihe otadhi patuluka ngaa noondjindikila dha tulwa po.

Ashike ominista yUuhaku nuundjolowele Kalumbi Shangula okwa hokolola kutya ngashiingeyi epangelo otali ka kutha ko oshinakugwanithwa shotakala kutya aahingi yomaloli otaya konaakonwa nokupupwa omukithi ngoka kehe ethimbo taya thiki moshilongo meendelelo ngaashi tashi vulika.

“Ngashingeyi kehe omuhingi gweloli ngoka ta ke ya moshilongo muka oku na oku ka ikalekelwa mookamba dhepangelo noshowo okukonaakonwa pethimbo ndyoka taya thiki noshowo pethimbo ndyoka taya zi mookamba okusa oshimpwiyu kutya oye na ombuto nenge kaye na,” osho Shangula a hokolola ngaaka.

Shangula okwa popi woo ta ti ngashiingeyi oondingosho otadhi ka patuluka niikolitha otayi tameke okulandithwa ashike okutameka potundi 12h00 sigo 18h00 okuza Omaandaha sigo Olyomakaya, naaalandi inaya pitikwa okunwina mpoka ihe otaya ka nwina komagumbo.
“Omahala gwomanwino ngoka goocasino nooshowo ookalaba inadhi pitikwa okupatuluka manga oshoka otaga vulu unene okugongalwa ndele aantu taya taambathana omukithi ngoka,” osho a hokolola ngaaka.

Okwa ti iikolitha inayi pitikwa okulandithwa mOosoondaha nenge momasiku ngoka gowina aantu taya fudha po.
Omahala gokulanditha iikulya ya pya oga tegelelwa ashike ga patuluke ee taga gandja iikulya kaantu mboka ya ninga oshilage opo ya telekelwe.
Ashike Shangula okwa hokolola kutya omalandithilo ngaashi gwoonyama unene okapana otaka patuluka naalandi otaya vulu oku kuutumba po ee taya li ashike aantu naya kale yi iyutha komalombwelo ngaashi okukala pamwe oshinano shoomita 1 pokati komuntu nomuntu.
Okwa ti woo kutya oshiluku shika oshititatu osha tegelelwa okuya sigo omasiku 29 gaJuni ihe ngele opwe ya sha shomeendelo tashi vulu okuthiminika oshiluku shika shi talululwe nena epangelo otali vulu okulundulula onkalo ndjika.
 


2020-05-29  Loide Jason

Tags: Khomas
Share on social media