New Era Newspaper

New Era Epaper
Icon Collap
...
Home / Ombuto yoCovid-19  ya shunifa eyandjo lohonde pedu

Ombuto yoCovid-19  ya shunifa eyandjo lohonde pedu

2021-06-16  Festus Hamalwa

Ombuto yoCovid-19  ya shunifa eyandjo lohonde pedu
Top of a Page

Festus Hamalwa 

Ehangano li na sha nokuyandja ohonde kovanhu moshilongo ledina Namibia Blood Transfusions Service ola taalela eshongo lakula eshi la didilika omwaalu vovanhu tau ende nakashona unene tuu pefimbo eli lombuto yoCovid-19 i li tai dana onghandangala moshilongo.

Edi oda popiwa komupopiliko wehangano lohonde Titus Shivute, ta yelifa kutya odula ei omwaalu wovanhu owa shuna pedu neenghono shaashi oshiwana otashi ende nakashona okuyandja ohonde keenhele adishe moshilongo. 

Shivute ota ti ovanhu vamwe ova tila oCovid-19, naashi nee osha eta omwaalu u kale wa shuna pedu omwolo oCovid-19. 

“Ohandi kunghulile oshiwana opo shi twikile shi ka yandje ohonde osheshi ohonde oya fimana kovanhu vetu ava ve li momhumbwe yohonde. Onghee okuyandja ohonde oshinima sha fimana unene osheshi otashi xupifa eemwenyo dovanhu ve li momhumbwe,” Shivute ta ti.

Shivute okwa denga omufindo ta ti ohonde ei tai yandjwa koshiwana ohai kwafele omimikifi dihapu da yooloka.

“Ehangano letu lohonde ola kwashipaleka kutya keenhele adishe dokuyandjela ohonde oku na omilandu, noikwafifo ya wana yokukeelela ombuto yoCovid-19,” Shivute ta ti.

Okwa ti onghee oshiwana inashi kala shi na oumbada kombinga yoCovid-19 shaashi eameno opo li li la wana efimbo alishe.

Shivute okwa ti omauyelele amwe e li xwapo ohava yandje keeradio da yooloka domoshilongo.

“Oshiwana nashi twikile nokuyandja ohonde, oshiwana nashi topolelafane omauyelele a fimana e na sha neyandjo lohonde opo eemwenyo dovanhu di xupifwe,” Shivute ta ti.Okwa ti eenhele adishe dokuyandjela ohonde oda patuluka ngeenge oshiwana sha hala oku ka yandja ohonde.

Shivute okwa ti oshivike eshi oshi li oshivike shokudimbuluka efiku lohonde mounyuni, onghee Namibia naye ota ka dimbuluka efiku laye. Okwa ti ovanhu aveshe ava tava ka yandja ohonde oshivike eshi otava ka pewa omaano a yooloka.

Okwa kunghulila oshiwana opo shi twikile nokuluufa komilandu edi da tulwa po dokukelela ombuto. Ta weda po ta ti omunhu keshe na kale a djala okalapi kaye kokomulungu efimbo keshe.


2021-06-16  Festus Hamalwa

Share on social media
Bottom of a page