Loide Jason

Ombulukutu yaantu taya ningi omayindilo gwomapitikilo opo ya ze mo moondoolopa dhawo ndhoka dha patwa ngashiingeyi odha lundululwa kwaamboka taye dhi gandja oshoka aantu oyendji taya ende unene ya thinda kOwambo.
Etitano lya zi ko opwal i pwa monika omusholondondo omunene gwomahauto gu uka kOwambo ngoka ga li ga kankamekwa pomboloka yaKahandja.
Omukandapitikilo gwokweenda ogwa li nale hagu gandjwa kookansela yiikandjhogololo, oondohotola noshowo aakuluntu yiitaasi yopolisi kehe mboka yena oonkatu dhiilonga dha tameka puInspekta ashike ngashiingeyi , hasho we tashi ningwa.
Omukanda gwa shangwa kombelewa yomupilima gwoshilongo ogwa yelitha kutya ngashiingeyi mboka taya ende taya yi kiitopolwa yawo taya taaguluka oongamba dha tulwa po mokukondjitha omukithi gwoCovid -19 oye na okupewa epitikilo komukuluntu gwoshitopolwa ano Regional Commander gwopolisi ihe kasha shi we kaakuluntu yiitaasi yopolisi miitopolwa.
“Ngashiingeyi aakuluntu yuundjolowele miitopolwa oyo tuu taya gandja omikanda ndhoka ihe kasha shi we ookansela ngaashi sha li nale,” osho omukanda gwa hokolola ngaaka.
Ogwa li gwa tsikileko kutya ngashiingeyi mboka woo taya gandja omikanda kaalongisikola mboka ya patelwa miitopolwa hamo haya longele otagu gandjwa kaakuluntu yelongo yomiitopolwa mbyoka.
Ayihe mbyoka oya tulwa miilonga okutameka ohela. Ombapila oya holola kutya mboka ya uthwa okweenda methimbo ndika oomboka ye na oonkalo tadhi ya thiminike ya ende ashike kasha shi omuntu kehe ngoka a hala oku enda.
Iiyenditho oyindji okwa li ya lala ondangala pomboloka ndjoka oshoka omukweyo ogwa li omuleka noonkondo naakwashigwana yalwe okwa li ya shunithwa ko oshoka kakwa li ye na omikanda dha yela ndhoka tadhi kwashilipaleke kutya oya pumbwa oku enda shili ya ye hoka taya pula yaye.