NIAMEY – Omukithi gwoCoronavirus ogwa eta eso lyominista yaNiger yiilonga Mohamed Ben Omar, osho oTV yoshigwana ya li ya tseyitha ngaaka mOmaandaha. Ongundu yopapolitika yoSocial Democratic Party (PSD) oya li ya lopota kutya Ben Omar (55) okwa si mOsoondaha moshipangelo oshinene shomoshilandopangelo Niamey ashike inaya popya osheetithi sheso.
“Omukithi omukenyaneki ngoka gwa dhipaga minista Mohamed Ben Omar,” oshitaasi shoTele Sahel tashi kundaneke ngaaka. Manga onkundana inaayi tseyithwa, oshitaasi shika osha li shu ulike sho ominista ya li tayi kumagidha aaniilonga ya igamene komukithi gwocoronavirus.
“Covid 19 omukithi gwoshili, kashi shi oshinima shiifundja. Otagu dhipaga. Otagu taandele ongepeya,” Mohamed Ben Omar osho a li a lombwele oshigwana ngaaka.
“Natu kaleni nelandulathano opo tu keeleleni omukithi nguka. Elandulathano olyo alike tali vulu okukala oshilwitho shomukithi nguka,” ta ti ngaaka.
Presidente Mahamadou Issoufou okwa ti okwa dhengwa pomutima keso lyominista ndjika.
Ben Omar okwa li a valwa mesiku 1 Januali 1965 mondoolopa yopondingandinga yedhina Tesker, okwa kala nokulela ongundu yo-PSD, ndjoka ya manga uukuni kumwe nongundu yaIssoufo yoParty for Democracy and Socialism. Okwa kala ominista yiilonga okuza mo2017, Ben Omar okwa li a tameke olweendo lwe lwopolitika mo1999 kohi yaPresidente Mamadou Tandja, moka a kala ominista miikondo ya yooloka moshilongo shika oshithigona shomoshitopolwa shaSahel.
Ben Omar okwa li gumwe gomwaamboka ya li ya yambidhidha noonkondo elundululo lyekotampango ndyoka lya li lya pitika Tandja a gwedhele oshikako she oshitiyali noomvula ndatu mo2009, ashike okwa ka umbwa ko koshipundi muFebuluali a landula. Manga inaa tota ongundu yoPSD, Ben Omar okwa kala oshilyo shongundu yoRally for Democracy and Progress. Niger sigo oompaka okwa koleka iiponga 755, nomaso 37 gomukithi gwoCoronavirus.
Oshilongo osha li sha pata oongamba dhaso, oosikola osho wo omahala goongeleka.
-Nampa/AFP