New Era Newspaper

New Era Epaper
Icon Collap
...
Home / Ominista yoikwamina neeghono a talela po ovalandifi vomahooli konooli

Ominista yoikwamina neeghono a talela po ovalandifi vomahooli konooli

2021-06-16  Festus Hamalwa

Ominista yoikwamina neeghono a talela po ovalandifi vomahooli konooli

Festus Hamalwa

Minista woikwamina neenghono Tom Alweendo okwa talela po ovalandifi vomahooli moshitukulwa shokonooli, omo kwa li a shakena navo kOshikango moshitukulwa shaHangwena Omaandaxa.

Alweendo okwa li a kala omutumba novangeshefa vokulandifa omahooli konooli omo kwa li tava kundafana oshikumungu shovanhu tava landifa omahooli paumbudi moNamibia shi he li papitikilo.

Minista okwa ti ovanhu nava xulife po okukala tava vakela omahooli moshilongo shi heli papitikilo shaashi oshi li sha nyika oshiponga neenghono.

Okwa popya ta ti okwa didilikwa ovakwashiwana vahapu hava ka tala omahooli moAngola opo va landife, naashi osha kala nee tashi nyenyetwa kovanangeshefa hava landifa omahooli tava ti kutya kasha li mondjila shaashi vati ihava mono vali ovalandi vahapu.

Onghee Alweendo okwa kufa onghatu opo aka shakene novanangeshefa novakwashiwana vomomudingonoko waShikango, opolifi yomoshitukulwa shaHangwena, nopolifi ya dja koshitulwa shaMusati noshoyo ngoloneya waHangwena opo va topolelafane omayele ngheene oshikumungu eshi shovanhu tava landifa omahooli paumbudi shi na okukala sha mona exulilo.

 “Ohandi kunghulile ovanhu unene tuu ovakalimo vomOshikango opo va xulife po omukalo ou wokulandifa omahooli shihe li papitikilo, onghee kukeshe ou ta kamonika ta landifa omahooli otaka pewa ehandukilo lokuya modolongo. Oshiwana omwa pumbwa okulikaleka kokule noinima youlingilingi shaashi oi li ya nyika oshiponga,” Alweendo ta ti.

Alweendo okwa ti ovanhu ohava pitile koshi  yodalate ei i li keengamba daNamibia naAngola, va humbata omandini omahooli. Okwa londwela opolifi opo i kale i li oupafi nokukwashipaleka kutya kukeshe ou ta ka monika e na omandini omahooli okwa pewa ehandukilo.

“Heeno oshi li eshongo lakula la taalelwa komininsteli yetu kombinga yodalate ei i li keengamba i na eembululu dihapu. Ohatu ka longa noudiinini opo tu shive okufitika eembululu edi di li kodalate,” Alweendo ta ti.

Pefimbo loshihongi, ovanangeshefa ova yandja omukanda wenyenyeto wavo kuminista tau popi kombinga yoshimaliwa shishona eshi hava longo paife shaashi vati ihava mono vali ovalandi va wana. Ova weda po tava ti kutya ove li hava futu oishoshela yokongulu, omanga ava hava landifa omahooli paumbudi ihava futu sha. Onghee ova koholola tava ti kutya eshi osha puka neenghono.

Minista okwa ti omahooli okwa nyika oshiponga shaashi ohaa dulu okweeta oshiponga shomundilo, unene kwaava ve hole okutula omahooli meebashu davo.

Okwa kunghulila oshiwana opo shi kale tashi lopotele opolifi ngeenge shi wete omunhu ta landifa omahooli shihe li patikilo shaashi inashi pitikwa tuu nande.


2021-06-16  Festus Hamalwa

Share on social media