New Era Newspaper

New Era Epaper
Icon Collap
...
Home / Ompangu ya tindi etalululo lyoshipotha shaHanse-Himarwa

Ompangu ya tindi etalululo lyoshipotha shaHanse-Himarwa

2020-02-04  Loide Jason

Ompangu ya tindi etalululo lyoshipotha shaHanse-Himarwa

WINDHOEK-Omupangulitokoli Christie Liebenberg okwa ekelahi eindilo lyominista onkulu yelongo Katrina Hanse Himarwa ndyoka a li a ninga opo oshipotha moka a li a monika ondjo shi talululwe kompangu onene yopombanda moshilongo yedhina Supreme Court. 

Liebenberg ngoka a popi ngaaka ongula yOmaandaha moshilandopangelo Windhoek moshitopolwa shaKhomas okwa ti ke wete oSupreme Court tayi ka gandja oshizemo sha yooloka kwaashoka omukuluminista a li apewa pethimbo lyoshipotha she moka a li a pewa egeelo lyokufuta oshimaliwa shooN$50 000 nenge oomweedhi 12 mondholongo.

Hanse Himarwa okwa li a tokola okufuta oshimaliwa shoka. Omukulu minista okwa li a pangulwa moshipotha shi na sha nokulunga itapula omvula ya zi ko sho aniwa a li a kutha mo omadhina gaakwashigwana momusholondondo gwaamboka ya li ye na okumona omagumbo ee ta tula mo omumwayina noshowo suwala gwe.

Oshipotha osha li sha tulwa mo kombelewa yokukonakoona iipotha yoonakulya taya itapula- Anti Corruption Commission (ACC), naHanse-Himarwa okwa li a monika ondjo.

Ashike omupangulitokoli ngoka okwa hokolola kutya ke wete sha endelela okutula mo oshipotha sheyindilo oshoka pethimbo lyiihokolola yoshipotha she okupitila momukalelelipo gwe gwopaveta Sisa Namamdje Hanse Himarwa okwa li a ulike kutya ke na oshimaliwa sha gwana okufuta iikwaveta onkene ali ta indile a pewe egeelo lyi li pevi.

Liebenberg okwa li a hokolola kutya pethimbo lyiihokolola yaHanse Himarwa, ina ulika nande ehalo kutya okwa hala egeelo lye lyi talululwe nonkene oshipotha shika kasha na we oshilonga ngele tashi ya pegeelo mpoka nokwe shi kutha mo nokuli momusholondondo gwiipotha mbyoka yi na oku pulakenwa mompangu ndjoka.

Hanse-Himarwa okwa li a monika ondjo komupanguli Liebenberg nokwa li a lombwelwa kutya okwa popya iifundja mompangu opo a itaalithe ompangu kutya uuyelele mboka wa gandjwa koombangi kawu shi woshili na ye ina longitha ombelewa ye pambambo.

“Minista ngoka okwa fundja. Okwa hokolola iifundja, ye okwa lundila aakonaakoni mboka ye li oombangi dhepangelo kutya oya thiminika oohatoyi moshipotha okupopya oshili shoka tashi nyateke edhina lyaHanse-Himarwa. Onke shoka omutamanekwa oku na ondjo,” osho omupanguli a lombwele ompangu ngaaka.
Hanse-Himarwa okw ali a longitha ombelewa ye okukutha mo edhina lyomukwashigwana momusholondondo gwaamboka taya pewa omagumbo eta tula mo omadhina gaapambele ye opo ya vule oku pewa omagumbo ngoka.


2020-02-04  Loide Jason

Tags: Khomas
Share on social media