New Era Newspaper

Icon Collap
...
Home / Ompumbwe yomwiidhi komudhingoloko guuluthilo lwa etele iimuna ondjala

Ompumbwe yomwiidhi komudhingoloko guuluthilo lwa etele iimuna ondjala

2022-01-07  Victoria Kaapanda

Ompumbwe yomwiidhi komudhingoloko guuluthilo lwa etele iimuna ondjala
Top of a Page

Kansela goshikandjohogololo shaKatyali Joseph Mupetami okwa kumagidha aanafaalama yiimuna moshikandjohogololo she ya kale ya ilongekidhila onkalo tayi  ya tula momalimbililo  omolwoluhepo lwomwiidhi.

“Omudhingoloko gwetu ogu na iimuna oyindji, omolwomahala guulithilo, ihe onkalo otayi ende yu uka kuuwinayi, nonando sigo oompaka inatu lopotelwa oshimuna sha sa kondjala,” ta fatulula ngaaka.

Ta ti, iimuna otayi monika nayi komalutu, oshoka kape na omwiidhi gwa gwana.

Mupetami ta ti omwiidhi ogundji ogwa hanagulwa po kepeya lyomumvo gwa yi, ngoka kwa li tagu pititha po ashike esiku limwe nenge gaali, go natango ogwa yaka.

“Ombuga oya mbugalekwa komulilo, shoka sha tula aanafaalama momalimbililo kutya pamwe nonuumvo oku na ondjala,” ta ti ngaaka.

Ta gwedha po ta ti omvula oya gwedha ko kuupyakandhi mboka, oshoka omwiidhi ogwa pumbwa omata gomvula opo gu tsapuke.

“Iimuna ohayi ende oondjila oonde, okukanwethwa komatale ngoka inaaga pwina natango, oshoka iishana mbyoka ya li yi na omeya ga li ga lokwa petameko lyomvula oga pwina thiluthilu,” Mupetami ta ti ngaaka.

Ta ti,, iimuna natango oya taalela uupyakadhi  wenota, shoka tashi ya hingile monkalo yondjala, ee tayi si po thilu.

“Omvula ngele itayi loko momasiku ngaaka twa taalela, otatu ka kanitha iimuna yetu, onkene otandi kumagidha aanafaalama yiimuna ya kale ya ilongekidhila onkalo ndjika ,” ta kumagidha ngaaka.

Mupetami ta ti, uuna nenge ngele  shoka tashi fekelwa  tashi ka holoka, aanafaalama inaya etha we ya ye muupyakandhi wa fa womumvo 2019, sho ya li ya kanitha iimuna yawo kondjala.

“Kambadhaleni okulanditha po iimuna yeni kuyele, ngele ku na shoka to vulu okupalutha nasho iimuna,” Mutami ta kumagidha aanafalama.

Negonga Shikongo ngoka e na ohambo yiimuna koshikandjohogololo shUuvudhiya okwa ti oongombe dhawo itadhi uulike nawa komalutu omolwondjala.

“Omeya nomwiidhi oyo iipalutha yiimuna. Onkalo ndjika ngele otayi tsikile ngeyi, otayi ke tu thiga pomutenya,” ta popi ngaaka.

Ta ti, otashi ka pula oshimaliwa oshindji okulandela iimuna oomwiidhi, iimongwa oshowo okutekela omatemba gomeya.

Simon Shifekeni omunahambo ota nyenyeta kutya ohaya ende oondjila oonde unene okukanwetha iimuna.

“Iimuna ohayi pandula mbala, ngele okwa li ngaa omvula tayi shasha ko kashona, ihe omwidhi tagu tsapuka, momasiku gaali oongombe odha paluka nale komalutu,” ta popi ngaaka. vkaapanda@nepc.com.na 

 

  


2022-01-07  Victoria Kaapanda

Share on social media
Bottom of a page