ONGWEDIVA – Omhangulilo yopombada mOshakati mEtitatu loshivike eshi oya pa Fransisco Gerson Joao eedula 30 modolongo molwaashi a dipaa omukainhu, a li kaume kaye komoihole. 

Joao okwa pewa ehandukilo olo omolwa edipao laMerjam Selma Amutenya oo e li ina yokaana kaye. Omulumenhu ou vati okwa longifa oskulufu okutwa Amutenya oikando itano mombuda nomeemhati, molwaasho vati a uda kutya Amutenya oku na po kaume komoihole oo ha vake naye.   
Amutenya opo a fila ponhele opo a twilwa. 

Omupanguli Herman January pefimbo a li ta yandje ehandu eli, okwa ti, omwenyo womunhu oshinima sha fimana neenghono nowa amenwa kekotamhango laNamibia.
“Pakukala, edipao olo oshikulumuna shinene neenghono onghee ola talika ko kutya olo oshimbuluma sha shiya ko, nonghee omhangu otai ka dopa moilonga yayo ngeenge oya kala inai yandja ehandukilo la kwata moiti moshiima eshi. 

“Ouwa nehalo loshiwana nau amenwe, woo nau kale u wetike kutya owa amenwa. Nomoshinima eshi, kape na nande omhito imwe, omutamanekwa oku na oku kala modolongo oule wefimbo. Eshi osho etokolo lange moshinima eshi shedipao la‘nghinanghenda’ kuhe na vali,” omupanguli January ta ti.
Omupanguli okwa weda po kutya, otashi ulike kutya Joao okwa kala e na omhangela yokudipaa Amutenya nomolwaasho e mu vakela noku mu twa mombuda.  

“Nakufya ka li ta dulu oku liamena nande eshi a dipawa. Okwa tuwa mombuda. Oumbangi otau ulike kutya okwa kendabala ngeno okufaduka po omutamanekwa. Ashike omutamanekwa okwe mu vakela noku mu ponokela. Eshi pamadilaadilo ange, ondi wete kutya omhangela i li poluhaela youkolokoshi wa dilaadilwa nawa,” Januali ta ti.  

Ndilimeke Nghikevali, ina ya nakufya okwa ti okwa dimina po omudipai ou, nonande ina tambula ko ombili yaye momhangu shaashi keshi ngeenge okwa vava shili edu. 
Ta ti omona okwe mu fiila oufyoona, shaashi oye a li he mu kwafa okulima epya laye. 
Ta ti oku na ounghundi wombuda nonghene iha dulu okutwa, na nakufya oye kwa li ha tu oilya meumbo.