Omuhongifikola weedula 30 okwa fya eshi a dengwa nodopi kukaume kaye Olomakaya efimbo lokonguloshi potundi 23h00 pondingosho Havanna modoolopa yaMuthiya .
Nakufya okwa tongolwa oye Tomas Mega-Mega Nambahu omuhongifikola pofikola Olupale combined school ili mOmuthiya.
Omukonakoni woimbuluma wopolifi moshitukulwa shaShikoto omupe commissioner Petrus Shigwedha okwa hokolola ta ti Nambahu okwa li tava nu poundingosho pamwe nomufekelwa nokonima ova ka tameka tavanguna.
Opolifi oya ti eshi ovalumenhu va tameka okulidenga Nambahu okwa lotokela kotuwa yaye a ka tale ombele yokapi ndele ta tameka okutataya omufekelwa eshi ta faduka po.
Vati Nambahu okwa kala nokutataya omufekelwa ekwete ombele shaashi omufekelwa ka kwali a hala olwoodi.
Omufekelwa okwa kufa odopi ei kwali ili mondjila eshi ta faduka po ndele ta denge omuhongifikola moshipala nokulidenga po pedu.
Okwa ti Nambahu okwa twalwa koshipangelo shepangelo shaMuthiya opo a ka mone epango lopaunamiti lomeendelelo, efiku tuu olo okwa tuminwa koshipangelo sha kula shaShakati shaashi okwa li eli monghalo idjuu eshi a mona oshiponga moshipala.
Nambahu okwa xulifa Omaandaxa efimbo lomutenya shaashi ka kwali eli monghalo iwa.
Omufekelwa weedula 31 okwa kwatwa po nokwa holoka momangu yamengestalata waNdangwa Etivali.
Ovakwapata vaye ova shiviifilwa efyo laye nomakonakono opolifi otaa twikile.
Opolifi oya kunghulila oshiwana opo shixulife po okukala tashi tanguna keendingosho nokukala yoo shina oilwifo shaashi osha nyika oshiponga ngeenge omunhu e na oshilwifo keendingosho