New Era Newspaper

New Era Epaper
Icon Collap
...
Home / Omukainhu (24) a dipaela xekulu (70) pondingosho

Omukainhu (24) a dipaela xekulu (70) pondingosho

2023-12-01  Festus Hamalwa

Omukainhu (24) a dipaela xekulu (70) pondingosho

Omukulupe weedula 70 okwa fya konima eshi vati a tuwa nombele komutekulu waye weedula 24 pefimbo kwa li tava tanguna peendingosho.

Oshiningwanima osha ningwa moodolopa yaKeetmanshoop Etitatu efimbo lokonguloshi. 

Nakufya okwa tongolwa oye Johannes Rooi omukalimo womodoolopa yaKeemanshoop.

Omukulunhu wopolifi koshikondo shokukonaakona oimbulu moshitukulwa sha||Kharas omupedu Commissioner Nicodemus Mbango okwa hokolola ta ti omufekelwa vati okwa lundilwa kutya okwa vaka mo oimaliwa yaxekulu nokudja opo ova tameka eenhangu.

Omukainhu ou okwa kufa ombele nokutwa xekulo monhulo.

Rooi okwa xulifa konima yokafimbo eshi a fika moshipangelo shaKeetmanshoop.

Omufekelwa otwa kwatwa po nota pangulilwa oshibofa shedipao.

Oshiningwanima shikwao, okamatyona keedula 18 oka xulifa konima eshi vati ka dengwa nodopi komutwe.

Oshiningwanima osha ningwa keendingosho di li momukunda Odibo moshitukulwa shaHangwena efimbo lokonguloshi.

Nakufya okwa tongololwa oye Paulus Valombweleni Nghuuluka omukalimo womomukunda Onamhinda.

Omupedu Commissioner Zachariah Amakali okwa hokolola ta ti Nghuuluka okwa hanga ongudu youmatyona vakwao keendingosho tava dana otumbutumbu yoimaliwa.

Okudja opo vati kwa kufa mo ombele yaye e i kwete peke ndele ta kala ofika mondambo ta lombwele vakwao kutya nava xulife po okudana otumbutumbu yoimaliwa.

Otaku hokololwa kutya umwe womoumatyona okwa kendabala okunyeka ko ombele yaNghuuluka.

Okudja opo nakufya okwa pula ombele yaye, nokutameka ta kupula omamanya kovafekelwa. Otaku hokololwa omumwainamati umwe womufekelwa okwa dengwa nemanya mepepe kuNghuuluka ashike ina mona oshiponga.

Okudja opo umwe womufekelwa okwa kufa emanya nokudenga Nghuuluka komutwe nokuxulifila mondjila okuya koshipangelo shaShakati Etivali.

Omufekelwa weedula 20 okwa kwatwa po nota pangulilwa oshibofa shidipao.

Opolifi oya kumaida oshiwana opo shi xulife po okuumbata oilwifo ngeenge tashi i keendingosho molwaashi osha nyika oshiponga ngeenge omunhu a kolwa e kwete oshilwifo.

fhamalwa@nepc.com.na 


2023-12-01  Festus Hamalwa

Share on social media