Festus Hamalwa

Omukainhu weedula 32 Lusia Nakadilu Hidipo okwa fya eshi a tetaulwa nomakatana kohonda yaye yomido 45, onguloshi yOmaandaha 2021 lopo23H40.

Oshiningwanima osha ningilwa meumbo omo hamu di omufekelwa, momukunda Oikalahanye moshikandjohoololo Ongenga moshitopolwa shaHangwena. 

Omupopiliko wOpolifi mOhangwena Inspector Abner Kaume Itumba okwa koleka oshiningwanima eshi.

Itumba okwa hokolola kutya nakusa okwa li a yi mOsoondaha keumbo lohonda yaye oko kwa li a ka taalela po. 

Opolifi otai hokolola kutya osheetifi sheefyo eli inashi shiivika natango ngeenge omulumenhu ou okwa li pamwe tava tanguna nanakufyaa.

Inspector Itumba okwa ti omufekelwa okwa kwatwa po noku li modolongo pOmungwelume moshitukulwa shaHangwena.

Omakonaakono opolifi otaa twakile novakwapata vanakufyaa ovashivifilwa onghundana yeefyo eli. 

Nakuninga oshiningwanima eshi okwa teelelwa a holoke momangu ya Eanhana oshivike eshi.