Omukainhu weedula 29 e li meteelelo okwa hangika a xulifila meumbo lavo loshipeleki komumwainamaiti.

Omukainhu ou okwe lituwa Etivali kolukanda Otjomuise moWindhoek efimbo lokomatango.

Nakufya okwa tongololwa oye Laimi Hameva omukalimo womOtjomuise.

Omupopiliko wopolifi moshitukulwa shaKhomas Warrant Silas Shipandeni okwa hokolola ta ti Hameva okwa kala ha di mobashu yaye oye auke.

Vati omulumenhu oo okwa kala a limbililwa eshi ongodi yamumwainakadona dima oule womafiku avali.

Opolifi oya hokolola tai ti omulumenhu oo oha longele koWalvis Bay nokwa li a dja ko Etivali e ya okutalela po moshilando.

Eshi vati a fika okwa hanga pobashu pa pata nokonima okwa patulula po shaashi naye okwa hangika e na oshapi.

Opolifi oya ti eshi a patula po okwa hanga Hameva a xulifa a nangala pedu.

Ongodi yaye yopeke oya hangika pombete noshoyo oinima yaye aishe omo ya hangika mobashu. Omulumenhu oo okwa lopotela opolifi diva. Olutu laHameva ola twalwa kokila notaku fekelwa kutya okwa fya efyo lopaushitwe, nokwa li e na eteelelo leemwedi heyali. Kape na omunhu ta fekelwa mekwatafano lefyo laHameva.

Lwopokati opo okwa lopotwa omulumenhu weedula 44 Wouter Van Zyl naye e lituwa a fya meumbo laye Etivali koEros moWindhoek efimbo lokomatango.

Opolifi oya hokolola tai ti ongodi yomulumenhu ou oya ninga omafiku ya dima, naashi osha eta opo ovakwapata vaye va kale va limbililwa kutya oku li peni.

Vati eshi ovakwapata ve uya keumbo laye ova hanga peumbo pa patwa nokonima ova ninga onghendabala yokuteya po omuvelo.

Opolifi oya hokolola tai ti eshi peumbo pa tewa Van Zyl okwa hangika a fila mokadjuwo.

Vati nakufya okwa kala e na oudu womutima onghee otaku fekelwa kutya pamwe naashi osho sha eta efyo laye.

Kape na ou ta fekelwa mekwatafano nefyo laye nomakonakono opolifi otaa twikile

– fhamalwa@nepc.com.na