Aanafalama naanamapya mboka ya li ya tameke okulonga omapya gawo sho omata gotango ga loko, oye na uumbanda iilya yawo yi se po komutenya, oshoka omvula inayi loka.
Maria Shikalepo momokunda Okatana okwa
ti iilya yawo otayi monika nawa sigo ompaka, ihe otaya shololithwa komvula ndjoka itayi loko.
“Okwa li twa tondokele okulonga omapya getu mbala oshoka otwa li tu na omukumo kutya pethimbo ndika omvula oyi na okukala tayi loko ngaashi shito,” ta hokolola ngaaka.
Shikalepo ta ti, omimvo dha piti, ngaashi ethimbo ndika ngeno otaya li nale omakunde okuza momapya gawo, ihe sigo oompaka osha kukuta.
Aakalimo yokoshitopolwa shaHangwena mboka nayo ya li ya longo omapya kuyele otaya nyenyeta omvula noye na uutile yi kale inaayi loka yo ya ka pululule ishewe.
Selma Hafeni gomomukunda Ondobe moshitopolwa shaHangwena okwa ti iilya otayi ende tayi si po komutenya, onkene oya pumbwa omata gomvula.
“Otatu tsikile nomagalikano, pamwe Omuwa te tu uvu. Otu na ashike uumbanda wokulongululula natango omapya getu,” ta popi ngaaka.
Kundana sho a li a ningi omapekaapeko komikunda ngaashi Othingo, Otuwala, Onashiku, Oniimwandi oshowo Uukwangula moshitopolwa shaShana aanamapya oyendji inaya tameka okulonga omapya gawo.
Helena Shikongo gomomukunda Othingo okwa ti oku na omukumo kutya omvula otashi vulika yi loke momasiku tage ya.
“Pamwe oya kala ko ngaa, ihe egulu otali gandja omukumo kutya otashi vulika omvula yi ka loke,” ta popi ngaaka.
Shikongo ta ti, omvula ngele oya loko nawa, opo ta ka tameka okulonga epya lye, oshoka ina hala okuhepeka iimaliwa oshowo oonkondo dhe.
Omukalimo gumwe gomomukunda Othingo okwa ti, omvula oya kala ko, shito ngaashiingeyi aniwa ngeno oye li moondima lela nenge ye li pokumana okulonga omapya gawo.
“Shika osha eta uumbanda momitima dhetu kutya pamwe nonuumvo oku na ondjala, ngaashi ndjiya ya li ko momumvo 2019,” ta ti ngaaka.
Ta gwedha po ta ti, uupyakadhi womvula ohau etwa kondjala ee taya kanitha iimuna yawo.
“Ngele omasiku oga tsikile okuya komeho kaape na omuloka, epangelo nali yambidhidhe omanga kuyele opo kaaya kanithe iimuna yawo ngaashi omumvo ngwiya gondjala,” ta popi ngaaka.