Omukainhu weedula 41 Rosalia Johannes okwa lulilwa konghalo eshi a fiwa po komulumenhu Jeremijah Mbugua Kamau womukwashiwana waKenya konima ou vati va hombola naye kumengestalata momudo 2005.

Omukainhu paife okwa patulula oshibofa kopolifi nelalakano opolifi I mu kwafele mokukonga omulumenhu oo opo a dule okukala a kwatwa po diva shaashi vati okwe mu hombola inashi dja kehalo laye.

 Opolifi oya hokolola tai ti Johannes okwa ninga onghendabala yokukonga Kamau ashike fiyo onena ina mona ouyelele kutya ota dumwa peni.

Pefimbo Johannes a hombolwa okwa li e na omido 22 ye vati kakwa li e shi okulesha nawa.

Vati omukainhu ou eshi a ka patulula oshibofa okwa lombwela opolifi ta ti okwa hombolwa inashi dja kehalo laye, yee kakwa li e na owino yokukala nomushamane womudjadjai.

Vati Kamau okwa kala omunailonga koNandos Kitchen mOshakati. 

Pefimbo Johannes a ninga eenghundafana naKundana okwa hokolola ta ti okwa hekwa kukahewa kaye eshi e mu lombwela a itavele Kamau opo va hombole komhangu.

“Kahewa kange okwa futwa oshimaliwa eshi a landifa nge po ndi hombolwe. Okwa heka nge ta ti Kamau oshipuna shi na oshimaliwa shihapu,” Johaness ta ti.

Onghee okwa ti paife okwa handuka shaashi kahewa kaye okwa kakeka edina laye kutya okwa hombolwa nale eshi ehe  na omushamane.

“Onda mona po omushamane wange unwe paife oo a hala tu hombole ashike eshi kwa li twa ya komhangu onda lombwelwa kutya okompiuta otai ku ulike kutya onda hombolwa nale,” ta hokolola.

Okwa yelifa ta ti pefimbo kwa li va ya komhangu kakwa li e shi okulesha oshingilisa onghee okwa ti okwa longifwa oshikumungu ehe shi kutya oshi li kombinga yashike shaashi okwa shainifwa eembapila inedi lesha.

Omudo wa dja ko Johannes okwa li a kwatifa po kahewa eshi kwa li e mu lopota kopolifi kutya okwe mu kengelela.

Kundana eshi a kwatafana nomukainhu oo ta ku tiwa oye a kelela Johannes, okwa hokolola ta ti Johannes ita popi oshi li.

“Aame nda li oshinghumbi sha kula pefimbo kwa li va ka hombola. Kamau oku li kaume kange kopofingo eshi e uya kwaame ta ti kutya okwa hala okuhombola omukainhu omuNamibia,” kahewa kaye ta hokolola.

Onghee oku dja opo ondaya kuJohannes opo ndi ka kundafana naye kutya ondina kaume kange a pumbwa efamba lokuhombola shaashi naye pefimbo opo Johannes okwa li e mu lombwela kutya okwa pumbwa omulumenhu. 

“Onda kufa Kamau ndele handi mu twala kobashu yaJohannes opo va ka monafane. Eshi va shakena Johannes okwa itavela Kamau opo a ninge omuholike waye nokonima ova ya komhangu yaShakati opo va ka shangife ohombo yavo,” ta hokolola.

Okwa hokolola ta ti oku dja opo Johannes okwa lombwela nge opo ndi ninge oshinghumbi shaye.

“Konima eshi va hombola Kamau okwa faduka po ndele tai fiye po Johannes shaashi mboli okwa li ashike a hala okupewa oufemba waNamibia,’’ ta hokolola.

Naashi osha ka eta opo Johannes a kale a handuka ta lundilenge kutya aame nde mu kengelela shaashi a fiwa po komushamane waye.

“Eshi kwa li Johannes a kwatifa nge po omupanguli okwa lombwela nge ta ti nandi ye keumbo shaashi kandi na ondjo yasha konima eshi omhangu kwa li ya ninga omakonakono,” ta hokolola.

Opolifi otai indile moshiwana opo shi kongife ko Johannes kombinga   yaKamau.

Kwaau e na ouyelele kombinga yaKamau na kwatafane nomukonakoni wopolifi mOshakati 0813299299 ile oshiwana shi lopotele opolifi keshe ili popepi.

- fhmalwa@nepc.com.na