Oministeli youndjolowele nonghalonawa oya lopotota kutya omukifi oo wa shivika nedina Congo Fever ou li wa aluka, nowa didilikwa moGobabis moshitukulwa shaMaheke oshoyo moWindhoek moshitukulwa sha Khomas.
Oministeli oya lopota omulumenhu umwe a xulifa konima eshi a monika omadididliko omukufi ou. Okwa hokololwa yoo kutya omulumenhu ou okwa li a monika omadidiliko oCongo Fever momafiku 16 Mai 2023 moGobabis. Omulumenhu ou okwa tuminwa koshipangelo shopaumwene shaLady Pohamba mOvenduka momafiku 17 Mai 2023. Eshi a monika kutya itashi pi vali omeva, okwa tuminwa koshipangelo shaCentral moWindhoek natango nokwa fikila te litulilwa mokandunda kokulikalekelwa opo a ningilwe omakonaakono nokonima okwa monika omukifi woCongo Fever.
Okwa lopotwa kutya okudja 18 Mai 2023 okwa didilikwa omwaalu wovanhu ve li 27 va kwatwa komukifi ou, omo 24 kwa lopotwa kutya ovapangi, umwe womuvo nokuli a xulifa nale novaneumbo vavali navo va kwatwa nale.
Oministeli youhaku noukalinawa oya lopota kutya oCongo fever ohai etwa komukifi hawu ufanwa Nairo Virus. Omukifi woNairovirus okwa tongwa kutya ohau etwa keenghupa unene tuu edi hadi kala koimuna. Omukifi oo ohau etwa yoo ngeenge omunhu a i mekwatafano noshimuna sha kwatwa komukifi ou, unene tuu ohonde yoshinamwenyo pefimbo tashi yuvwa ile okulya ombelela yoshinamwenyo shi li moukwatya wa tya ngaha. Natango okukala mekwatafano nomunhu e na oCongo Fever osha nika oshiponga shaashi ota dulu okukwatwa meendelelo.
Omunambelewakulunhu mouministeli wouhaku, Ben Nangombe ota kunghilile ovanahambo va kale hava tunhile oimuna yavo, voo va kale yoo hava djala oikutu yokuliamena ngee tave ya mekwatafano noimuna yavo. Okwa weda po yoo kutya ovanhu nava kale kokule neenhenhele di yadi eenghupa da dja moimuna. “Kaleni hamu likosho efimbo keshe mwa talela po oimuna yeni opo mu liamene efimbo alishe,” Nangombe ta weda po.
Oministeli oya tula po omilandu domeendelelo moitukulwa ivali oyo ya didilikwa nCongo Fever oKhomas nOmaheke. Ovakwashiwana aveshe vokoitukulwa ei ava va kwatwa komukifi ou ove li koshi yepango la kwata moiti, notava filwa oshisho pauhaku. Eendokotola doimuna nado ode lilongekida okuvatela keshe tuu apa pe na omadidiliko omukifi ou unene tuu moimuna.