New Era Newspaper

Icon Collap
...
Home / Omukiintu gwOmoshakati ta hepekwa komukithi gwoVintiligo

Omukiintu gwOmoshakati ta hepekwa komukithi gwoVintiligo

2021-02-25  Victoria Kaapanda

Omukiintu gwOmoshakati ta hepekwa komukithi gwoVintiligo
Top of a Page

Mirjam Faith Mangundu gwomOshakati okwa ti, okwa kala nomukithi gwoshipa tagu ithanwa “VITILIGO’’ uule woomvula hetatu, ngoka gwa piyaganeke onkalamwenyo ye. “Ohandi monika ndi na ombili, ashike omutima gwandje otagu luluma. Olutu lwandje olwa papatwa kiiyala iitokele, mbyoka tayi ende yu uka komeho kehe esiku,” Mangundu ta ti ngaaka.

Ta hokolola ta ti, omukithi ngoka ogwa tameke mo2012, sho a li a mono tango uutotona uutokele we ya moshipala, e tawu kana po, konima yoomwedhi owa galuka, e tawu kana po ishewe. 

“Konima yoomwedhi ndatu dha piti, okwa li nda mono uuyala wa faathana we ya mepunda, kakwa li sha halutha ndje oshoka okwa li ndi uvite kutya otawu shuna ngaashi shito.  Onda mono tawu taandele nepunda alihe, wumwe tawu tutuma kombanda dhoonyala no meni,” ta hokolola. Ta ti, sho a mono tawu indjipala, okwa li a yi koshipangelo ihe omiti ta pewa itadhi kwathele sha. Iiyala otayi ende tayi indjipala olutu aluhe. 
“Onda tula omutima mombinzi, e tandi taamba ko onkalo, nonando inandi shi panda. Onda taalela omashongo, yamwe oye li ompinge nomukithi ndi na, taya umbu ndje nomityonayi,  ohashi lindimaneke omwenyo gwandje,” ta popi newi lya gagala. Mungundu ta ti, omwedhi gwa yi okwa li a yi moshisiipili she, sho a pilameneko ombunda ye ayihe oya pwa ko kiiyala iitokele. Ta hokolola ta ti, omukulu gwonale okwa ti, konkola , wu egululwe, indila eto pewa. 

“Onda li nda shanga komalungula, andi indile ekwatho nomayele nkene ndi na okuninga. Omukiintu gumwe  e na omukithi gwa faathana nogwandje, okwa li a fatulile ndje nkene a kwathelwa kundohotola gumwe gwomOngwediva Medi Park,” ta ti ngaaka. Nonando oyendji oya kala taya ula ndje nayi kutya pamwe okwa li handi gwaya omiti dhokuninga omauyelele, yo yamwe otaya ti, nandi popye shoka nda hala okulongitha iimaliwa oshoka omukithi ngoka anuwa ihagu pangwa, inashi shololitha ndje.

Omukiintu ngoka okwa li u ulikilindje omathano sho a li tango omanga inaa pangwa, ihe ope na eyooloko enene naashi ta monika paife. Nonando oku li natango kohi yepango. “Otandi indile moshigwana ngele ope na ngoka ta vulu okukwathela ndje a yambidhidhe ndje noshimaliwa okumona epango, oshoka kandi na oshimaliwa sha gwana.

“Onda li nde ya mekwatathano naantu  ya thika puyane ye na omukithi gwa fa nguka, konima nda shanga komalungula, taya pula uuyelele nkene ye na okumona epango oshoka anuwa oya kambadhala ihe inaya mona ekwatho,” Ta popi ngaaka.
Omukiintu nguka okwa ti, natango otashi kala oshihwepo ngele ope na ngoka ta vulu oku ya yambidhidha ya ninge nando ye ye po niilandithomwa yontumba, opo ya vulu okugongela oshimaliwa shokufuta epango opamwe nayakwawo  kaaye na iiyemo.
Mangundu ota monika konomola  081 4959 442.


2021-02-25  Victoria Kaapanda

Share on social media
Bottom of a page