Okahauto hoka ka kala nokumbandameka aakwashigwana moWindhoek okaluudhe osho ka monika namwene gwako okwa li a tulwa konima yekumba.

Omukiintu gwomimvo 35, ngoka e shiwike nawa kuKundana ngoka a magwa mEtine lya zi ko ashike ita vulu oku umbulwa kedhina oshoka ina holoka natango mompangu okwa patululilwa iipotha yi li itano koCity police.
Superintendent mopolisi ndjoka Eliaser Iyambo okwa ti kutya aakonaakoni ya pyokoka oya li ya nothelwa ko kaakwashigwana, noya li ya yi kegumbo lyomukiintu ngoka koKelin Windhoek.

“Egumbo lye olya li lya hadhwa alihe nomwa li mwa adhika iinima oyindji ya yakwa. Ooyene yiinima mbyoka oya li ya lombwelwa niinima mbyoka oya li ya dhimbululwa kooyene,” osho Iiyambo a hokolola ngaaka.
Okwa li a tsikile ko ta ti kutya omukiintu ngoka okwa kala ha longele kumwe naalumentu yane mboka taya kongwa kopolisi sigo opaife shi na sha neyugo kwa homatiwa.

Okwa ti ongundu ndjika yookalyamupombo oya ninga ethimbo nuule tayi yugu aakwashigwana taya longitha unene tuu omakatana noshowo oombele nenge oondjembo.
“Omukiintu ngoka okwa li a adhika noonomola dhoohauto odhindji dha yoolokathana megumbo lye ndhoka haya tula koohauto uuna taya longo iimbuluma mbyoka, nadho odha kwatwa ko kopolisi pethimbo ndyoka onga uumbangi tawu ka longithwa moshipotha shika,” osho Iiyambo a hokolola ngaaka.

Okwa li a tsikile ko ta ti omukiintu nguka opo ashike a zi mo mondholongo muMaalitsa nuumvo sho a li a sitalafwa ethimbo, shi nasha niimbuluma ya faathana.
Okwati kutya iinima yilwe yoo mbyoka yali ya lopotwa ya yakwa okwali ya adhika mohauto ye ndjoka onduudhe.
“Omukiintu nguka otwa li twa adha e na ondumba yiikuti yoondjembo, noshowo iikwandjembo yilwe ya longithilwe meyako lyahomatiwa moHochland Park  muJuni nuumvo,” osho Iiyambo a hokolola ngaaka.

Onkene ngashiingeyi opolisi otayi kongo  meendelelo aalumentu yatatu nenge ye vulithe po mboka haya longele kumwe nomukiintu nguka unene ngele tashiya meyako kwa homatiwa.
Omukiintu nguka ngashingeyi oku li modholongo yomoKlein Windhoek , nokwa tegelelwa oku ka holoka mompangu nena