New Era Newspaper

New Era Epaper
Icon Collap
...
Home / Omukiintu ke shiwike a itapele epunda metoto lyaMuni

Omukiintu ke shiwike a itapele epunda metoto lyaMuni

2020-02-12  Loide Jason

Omukiintu ke shiwike a itapele epunda metoto lyaMuni

Victoria Kaapanda naLoide Jason

ONGWEDIVA –Okanona taka ulike kutya oka tapwa pepunda inaa ka kola oka adhika miiyagaya mOutapi omutenya gwaankala Omaandaha, kugumwe a li a ka ekelahi iiyagaya ketoto lyaMuni mOutapi.
Otaku hokololwa kutya omukiintu ngoka inaa tongololwa okwa ikutha uusimba taku tengenekwa u li poomwedhi ndatu e ta ekele okanona metoto.

Omupopiliko gwopolisi moshitopolwa shaMusati Lineekela Shikongo okwa ti oshiningwanima osha li sha lopotwa potundi 12h50. “Otaku tengenengwa kutya omufekelwa okwa li a kutha mo epunda, e ta ekelehi ohanona metoto lyiiyagaya. Ohanona ndjoka oya li ya adhika ya tonyenwa moshifokundaneki,” Shikongo ta ti ngaaka. Ohanona ndjoka okwa li ya itsuwa kugumwe ngoka ha longitha etoto ndyoka olundji, nokwa li a lopotele opolisi, meendelelo. Opolisi moshitopolwa ShaMusati otayi pula moshigwana ngoka e na uuyelele, waangoka a longo iilonga ya tya ngaaka, a lopotele opolisi yopopepi naye.

Lwopokati mpoka opwa lopotwa omukulupe gwomimvo 67 a ningi oshihakanwa shekwatonkonga sho a kwatwa koonkondo kaalumentu.

 Okwa hokololwa kutya oshiningwanima shoka osha ningilwa pomukunda gwedhina Olupito moshikandjohogololo shaKalongo mEtitano onguloshi lela. 

Omugandjimulombo gwopolisi moshilongo Deputy Commisioner Kauna Shikwambi okwa hokolola kutya aalumentu yeli yatatu kayeshiwike oya ponokele monduna yomukulupe ngoka  etaye mu pendula taye mu pula iimaliwa mbyoka a tambula kopenzela. 

Shikwambi okwa ti aalumentu mboka kaye shiwike oya ningile omukulupe ngoka omandameko nombele sigo taya sindana mokumukutha iimaliwa ye koomuma N$800.

 Aniwa gumwe gwomaatamanekwa mboka inaya mangwa sigo onena okwa longele nduno omukulupe iilonga yomuyonena, sho e mu mbulukutile noku mu kwatwa koonkondo.

 Moshiningwanima sha faathana shomoshitopolwa sha yooloka shaShana  omukiintu gwomimvo 20 okwa li a kwatwa onkonga  komulumentu gwomimvo 30. Oshiningwanima shika osha li sha ningilwa pomukunda gwedhina  Oneshoko, mOshitayi. Okwa hokololwa kutya omutamanekwa okwa li a yi mondunda yanakuningilwa omuyonena omanga a li ta ka lala.

Okwa li a yi moshipala nakuningilwa omuyonena mokweedhila omweelo ngoka  e te mu ningile omambandameko  ngele okwa kugu. Okwe mu undulile kombete koonkondo sigo tayi naye miihulo kashi li pahalo lye.

Omutamanekwa ngoka oha zi pehala mpoka tapu hiilwa komukiintu ngoka oshoka naye ota hiile, okwa mangwa.


2020-02-12  Loide Jason

Tags: Khomas
Share on social media