Omulumentu gwomimmvo (57), okwa mangwa po kopolisi moshitopolwa shaMusati, sho aniwa a kwata okanona komimvo heyali koonkondo.
Oshiningwanima shoka aniwa osha holoka Omaandaha goshiwike shika momukunda Onelombo momudhingonoko Etayi.
Omukuluntu gwopolisi moshitopolwa moka Titus Shikongo okwa ti, uuyelele wa zi kundohotola otawu ti, okanona inaka ningwa sha, itaka ulike ka kwatwa koonkondo.

“Nonando omayamukulo gandohotola oga galuka kutya okanona inaka kwatwa koonkondo, omufekelwa okwa mangwa po, sho a tulilwa mo oshipotha kuyina yokanona,” Shikongo ta ti ngaaka.
Shikongo ta ti, otaku hokololwa kutya omufekelwa, ohekulu yokanona hoka ka kwatwa koonkondo.  Ihaya zi megumbo limwe, ashiinda.
Omakonakono gwopolisi oge li metifa.

Moshiningwanima inaashi faathana nashikwawwo opolisi moshitopolwa shaShana otayi indile oshigwana shi longele kumwe nopolisi okukonga aafuthi mboka taya teyagula omagumbo gaantu ethimbo ye li kiilonga.
Opolisi otayi ti, omagumbo ogendji, oga teywa oku za mehulilo hiwike lya  zi ko, ethimbo lyomutenya moondoolopa Oshakati, Ongwediva nOndangwa.
“Omagumbo ga pita pugahetatu oga teywa ethimbo aantu yeli kiilonga, omwa kuthwa iimaliwa, oongodhi, ootv, oocompiyuta dhopeke, efiliza, omasiga nosho  tuu,”Opolisi ya ti ngaaka.

Opolisi tayi kumagidha oshigwana kutya, omagumbo inagathigwa we kaage na aantu. Ooyene yo magumbo naya kale taya longele kumwe naashinda shawo, nuuna pweya omayinyengo tagalimbililike taya tseyathanene.
Opolisi ta yi ti, oshigwana nashilopote kopolisi ngele sha mono omayinyengo taga limbililike momidhongoloko dhawo nenge oohauto tadhi ende kopate kaadhina oonomola.
Naya dhenge koonomola dhosheendela  081 363 0666, 081 402 9009, 065 234000 oshowo 065 242650. 

Omukuluntu gwopolisi koshitukulwa shaMusati Titus Shikongo 
Ethano: Nampa)