Festus Hamalwa
Omukulupe womido 61, oo a li omupolifi ashike paife oku li mopenzela, okwa kwatwa po eshi a dipaa omulumenhu mukao womido 54, e mu twa nomukonda.
Nakufya oye Amon Natanael wopOkatope moshitukulwa shaHangwena. Oshiningwanima eshi osha ningwa Etivali komatango lwopotundi 18h00. Opolifi oya koleka oshiningwanima eshi. Omupopiliko wopilifi Inspector Kaume Itumba okwa hokolola kutya Natanael okwa li tava tanguna nomulumenhu weedula 61 ou oye e li omufekelwa, efimbo lokomatango popepi nongeshefa yedina Onawanawa i li momukunda wavo Okatope. Pefimbo leenhangu, omufekelwa okwa pweya mo omukonda noku twa Natanael. Itumba okwa ti Natanael konima eshi a tuwa okwa falwa koshipangelo kEngela, nefiku tuu olo okwa tuminwa koshipangelo shakula shaShakati opo ngeno a ka mone epango lopaunamiti lomeendelelo, ashike mupya munene okwa xulifila mondjila. Nakulonga oushada okwa kwatwa po efiku tuu olo noku li kodolongo yaHangwena nokwa teelelwa a ka holoke momhangu yaHangwena oshivike eshi. Ovakwapata vanakufya ova shiivifilwa efyo laye nomakonakono opolifi otaa twikile.