Omukulupe weedula 63 okwa fya Omaandaxa eshi a pila monduda yaye yokunangala konguloshi potundi 22h30 momukunda Okamwandi Kamadhinga moshitukulwa shaMusati.
Nakufya oye Shipili Simon Shikongo omukalimo momukunda Okamwandi Kamadhinga moshikandjoohololo shaNesi.
Omukonakoni woimbuluma wopolifi moshitukulwa shaMusati Moses Shimaho okwa hokolola ta ti onduda yomukulupe oya haka omundilo efimbo kwa li a nangala.
Vati omukulupe oha nu omakaya onghee ovanhu otava fekele kutya pamwe omundilo ou na okukala wa etwa eshi kwa li ta nu omakaya meni londuda.
Ovanhu otava fekele kutya omundilo nau kale tete wa kwata komalapi omonduda yaye fiyo tau ii kombete yaye.
Opolifi oya ti eshi omukulupe a mona kutya onduda yaye oya tema aishe okwa tameka ta kuu ta ufana okaana kaye kokamati hava di nako meumbo.
Eshi vati okaana kaye ke uya oka hanga nale onduda aishe ya tema ashike kakwa li taka dulu okuyambidida xee.
Omukulupe okwa pya po filufilu eshi olutu laye la lungwina po itali dulu okudimbulukiwa.
Olutu laye ola twalwa kokila yopolifi yaKahao opo li ka ningilwe omakonakono.
Ovakwapata ova shiviifilwa efyo laye nomakonakono opolifi otaa twikile.
– fhamalwa@nepc.com.na