New Era Newspaper

New Era Epaper
Icon Collap
...
Home / Omukulupe a si shi nyanyaleka sho a pi nokulunguna po

Omukulupe a si shi nyanyaleka sho a pi nokulunguna po

2022-09-27  Victoria Immanuel

Omukulupe a si shi nyanyaleka sho a pi nokulunguna po

Omukulupe gwomimvo 97 okwa si eso lyi nyanyaleka sho a pi po thiluthilu, sigo a lunguna po komulilo ngoka kaagu shiwike kutya ogwa zi peni.

Omugandji gwomauyelele gopolisi moshitopolwa shaShana Thomas Aiyambo okwa ti, oshiningwanima shoka osha holoka momukunda Okamule.

Otaku hokololwa kutya omukulupe ngoka okwa li a lala oye awike, onkene kakwa li a monika mbala opo a yambidhidhwe.

Gumwe gomaakwanezimo ye, Shilongo Reinhold moonkundathana noshifokundaneki shika okwa ti, ondunda ndjoka okwa li ya monika ya yaka omulilo koongula lwopotundi 04h00.

“Natango katu na uuyelele wothaathaa kutya omulilo ngoka ogwa zi peni, ihe oshoka otu shi kutya okwa kala omuhili gwomakaya, otatu fekele kutya pamwe okwa li a tema ekaya, ndyoka olyo lyi na okukala lya eta omulilo,’’ ta popi ngaaka.

Reinhold ta ti, otaya fekele kutya pamwe okwa li a tenteke okati kokapalwa pomalapi, ngoka ge na okukala ga kwata omulilo.

Ta ti, kakwa li pe na ngoka u vu ewi lye, oshoka ethimbo ndyoka aantu megumbo okwa li ya kotha.

‘’Kape na shoka sha hupu mo mondunda, omutoko ashike gu li po, nolutu lwe olwa pi po thiluthilu,’’ ta popi ngaaka.

Ta gwedha po kutya megumbo okwa li mo nomukulukandhi gwe oshowo oyana, mboka ya ka dhimbulula omulilo sho gwa yaka nale ondunda.

Nakusa okwa tseyika nedhina Niiwale Neepo. Aakwanezimo oya tseyithilwa.

Moshiningwanima shimwe inaashi faathana, okanona kokakadhona komimvo 12, oka kwatwa koonkondo ethimbo kwa li taka zi kosikola mehuliloshiwike.

Sha ikwatelela kepeko lyopolisi lyiiningwanima ya holoka mehuliloshiwike, oshiningwanima shoka osha holoka moshanga shomutenya momukunda Onatsi, moshitopolwa shaShana.

Otaku hokololwa kutya omulumentu gumwe keeshiwike okwa li a kwata okanona okuza konima, e ka kwata komeho nokomulungu, ee te ka hilile momwiidhi gwa li popepi.

Opolisi oya ti, omulumentu ngoka okwa li a kwata okanona koonkondo, omanga te ka lombwele kutya ngele oka kugu ote ka dhipaga omanga e na ombele meke. 

Opolisi oyi li molukongo lwomulumentu ngoka, naangoka e na uuyelele kombinga yaangoka  a ningi oshiningwanima shika na lopotele opolisi yi li popepi naye.  vkaapanda@nepc.com.na

 


2022-09-27  Victoria Immanuel

Share on social media