Opolisi moshitopowa shaMusati otayi kumagidha aakalimo ya kotokele ookalyamupombo, mboka taya ende nomagumbo, nomadhina giifundja kutya yo aapolisi.
Omukuluntu gwopolisi moshitopolwa shaMusati Titus Shikongo okwa popi ngaaka, konima omukulupe gwomimvo 60 a yugwa iimaliwa N$107 500 kombaanga, sho a li a gandja uukwatya nuuthemba we awuhe koombudhi.
Oshinigwanima shoka osha holoka Etitano lya zi ko, momukunda Oshilulu, moshitopolwa shaMusati. Otaku hokololwa aalumentu ye li yatatu ya li ya yi megumbo lyomukulupe ngoka opo a penzelwa miilonga, taya ti, yo aapolisi yaNamibia onkene oya hala uuthemba we awuhe.
“Omukulupe omolwesimaneko lyoposi, okwa li a holola nokugandja uuthemba we awuhe kaapolisi yiifundja, oshoka okwa li ya zala omizalo dha faathana nopolisi yaNamibia,” ta hokolola.
Shikongo ta ti, aalumentu mboka okwa li ya longitha uuthemba mboka okunana iimaliwa mbyoka.
Omukulupe anuwa okwa li a gandja, okamutse ke koshilongo, ongodhi ye yopeke, oshowo okamboba nopina yako.
Shikongo okwa ti, aakulupe naya kale mesiloshimpwiyu oshowo megameno ethimbo alihe, unene mboka opo ya lalekwa miilonga oshoka oombudhi odha hala oopenzela dhaakulupe.
“Otandi kumagidha oshigwana, shi kale tashi kwashilipaleke nopolisi yili popepi okupitiila koongodhi meendelelo, oshoka aafuthi ohaya longitha omikalo odhindji okwiitaalitha ko oshigwana, opo ya longe shoka ya hala ya manguluka,”a kumagidha.
Ta gwedha po ta ti, oshigwana nashi kale wo shi na oonomola dhopolisi oshowo dhoombaanga, ndhoka hadhi dhengwa oshali okulopota iiningwanima ya tya ngaaka meendeelelo.
Moshiningwanima inaashi faathana, olutu lwomulumentu gwomimvo dhopokati olwa adhika kohi yomuti, sho a li a ningi esiku ta kongwa, momukunda Iikologo. Shikongo okwa ti, olutu ndoka okwa li lwa monika Omaandaha sho a li a tamekwa okukongwa okuza Etitano, momudhingoloko gwaElim moshitopolwa shaMusati.
“Omulumentu ngoka Omuangola, megumbo moka a li ha zi mo oye awike, okwa li mo onga omuniilonga ashike,” ta ti ngaaka.
Okwa tseyika nedhina Shindele Petrus Hifingoto, a yambukile momukunda Omongwa moAngola. Aakwanezimo ye oya tseyithilwa. Ina thiga a shanga shoka she mu ikuthitha omwenyo.