Omukulupe gomimvo 61, okwalopotwa akwatwa koonkondo, komulumentu gomimvo 42, Etitano lya ziko koAranos.
She li kwatelela kepeko lyopolisi lyiiningwanima ya holoka mehuulilo shiwike, oshiningwanima shoka osha holoka lopotundi 00h00 molukanda Nuwerus.
Otakuhokololwa kutya nakufekelwa moshingwanima shika, okwali aponokele omukulupe ngoka, nokumukwatela oomako konima, eta mukwata koonkondo.
Omulumentu ngoka okwamangwa po kopolisi.
Iipotha oyindji yo makwatokoonkondo mehulilo shiwike oya patululwa miitopolwa ya yooloka yoshilongo, moka mwa kwatelwa natango okanona komimvo omulongo ka kwatwa koonkondo.
Okwalopotwa okanona komimvo 10, ka kwatwa koonkondo komulumentu ngoka anuwa kwali ha longo megumbo lyaandjawo.
She li kwatelela kuuyelele wa gandjwa mepeko lyopolisi, okanona hoka okali ka kwatwa koonkondo omanga aakuluntu yako kwali ya zamo megumbo.
Oshiningwanima shoka osha ningilwa momukunda Ondjokwe moshitopolwa shaShikoto.
Omulumentu ngoka tafekelwa moshiningwanima moka okwamangwa po nomakonakono gopolisi ogeli metifa.
Oshiningwanima inaashifathana, Omulumentu gomimvo 16 okwamangwapo anuwa kopolisi sho ali apatululilwa iipotha yomahepeko goomeme oshowo omakwatokoonkondo moshitopolwa shaShikoto.
Omukuluntu gopolisi moshitopolwa shaShikoto Armas Shivute okwati, omulumentu ngoka anuwa okwa kala talongele oomeme iilonga inayi uka.
“Uuyelele mboka okwali weya puuwayela konima, ali akwata omukiintu gomimvo 34 koonkondo, Etitatu lya ziko,” ta hokolola.
Ta ti, omulumentu ngoka ali atandokapo konima a patululilwa oshipotha, okwali a mangelwa megumbo limwe komukunda Onakandjangi.
Otaku hokololwa kutya okwali aningile omukiintu ngoka omatilitho kutya ngele okweshi popi, otemulongele omiyonena.
Uuyelele wa gandjwa mepeko lyopolisi, omunamimvo 15 okwali akwatwa koonkondo kaalumentu yali, gumwe gomimvo 21 omanga gumwe gomimvo 24 moshitopolwa shaHangwena.
Otaku hokololwa kutya, Etitano lya ziko aalumentu mboka yaali okwali ya hili omukiintu ngoka okuza megumbo sigo omiihwa moka yali ye mukwatele koonkondo, ayehe. Oshiningwanima osha holoka momukunda OmutwewOndjamba.
Alaumentu mboka oya mangwa po kopolisi.
Olyokaya ga ziko omulumentu gomimvo 19 okwamangwapo kopolisi sho anuwa akwata omukiintu gomimvo 16 koonkondo koKamanjab. Otaku hokololwa kutya omukiintu ngoka okwali a pewa ekwatho okuza kookume ke, sho kwali a kugu.
Omakonakono gopolisi ogeli metifa. Lydia Shikomba omuhungimwenyo mondoolopa yaShakati okwati, okwa dhidhilike kutya omakwatokoonkondo otaga ende taga indji pala omolwa omatompelo gontumba, taga vulu okundalwa po.
“Omalongo ogasimana, oyendji otaya longo iilonga ya tya ngaaka, na kashona yena ontseyo kutya, otaya hanagulapo onkalamwenyo ya nakuningilwa omuyonena,” ta popi ngaaka.
Ta ti, oyendji yeli moondjeedhililo otaya ipe uusama, kutya shoka ya ningi oshapuka, ihe ethimbo olya pwapo nale. “Euveko, olyo hali pukulula omuntu. Aanona ashona otaya kwatwa koonkondo, omanga kaayena oonkondo dhokwiigamena, otashi yemateke,” ta nyenyeta ngaaka.
Shikomba okwati, omikalo dhokukwatwa aantu koonkondo odhili pomaludhi ga yooloka.
Ta ti, yamwe oya kwatwa konkalo ndyoka, nangaashingeyi oshafa omukithi guli momalutu gawo, ihe shoka ohashi vulu okupangwa, okupitila momahungomwenyo.
“Hulithiipo okuthiminika aantu, kaashili pa mahalo gawo. Etheni aanona aashona unene, otamu yonagula oonkalamwenyo dhawo,” ta kumagidha ngaaka.
Omuhingimwenyo ngoka okwakumagidha oshigwana opo shi kale tashi kongo omamkwatho ku yele, uuna sha mono kutya onkalo ka yili nawa.
Ta ti, uunkundi wuli ngaaka ohau vulu okupangwa, okuyanda omaupyakandhi.
– vkaapanda@nepc.com.na