ONGWEDIVA – Omukulupe womido 86 vati okwe likufa omwenyo eshi e limangeleka mEtitano la dja ko.

Oshiningwanima eshi osha ningwa momukunda Oshaandja, u li mOshakati shOkounginino.

Otaku hokololwa omukulupe ou e limangelekela momuti, u li mepya laye pomukunghulo weumbo. 

Olutu laye vati ole lituwa komonamati oo e mu lixula ngonguloshi lwopotundi 21h00. Kape na ou ta fekelwa ngeno oye a kufa omukulupe ou omwenyo. 

Moshiningwanima shikwao, omukainhu womido 51 naye okwe likufa omwenyo, eshi e limangelekela monduda yaye yokunangala.

Otaku hokololwa omudimba waye we lituwa komusamane waye oo aha li mo meumbo pefimbo loshiningwanima. Omusamane vati okwa lombwela omonamati noshoyo ovakwanedimo vamwe, ovo va dengela opolifi. 

Olutu lanakufya ola twalwa kokila yopolifi kOshakati. Inapa hangwa okambapila taka holola kutya omolwashike omukainhu ou e likufa omwenyo. 

Omupopiliko wopolifi mOshana Chief Inspector Tomas Aiyambo okwa koleka oiningwanima ei ivali ta ti omakonaakono opolifi otaa twikile. 

Moshiningwanima shikwao sha yooloka kwaai ivali, ondingosho yedina Apollo Eleven, Eluwa mOshakati, oya ponokelwa kovalumenhu vahamano va homata eembistoli nokunyeka mo omaliko. 

Otaku hokololwa ovalumenhu ava va ya mombaa omo, ndele tava lombwele keshe oo a li mo opo a nangale pedu.

“Umwe womeembudi okwa ya komalandifilo ndele ta ulike omukainhu ta landifa ondjebo, ta ti ne mu pe oshapi yokoshikefa shoimaliwa. Omufekelwa mukwao okwa ulika ondjebo kokakadona oko haka longo komaalaka opo vati ke mu pe oimaliwa,” Aiyambo ta ti.

Ookalyamupombo ava vati ove shi pondola okunyeka ko eengodi dovalandi ovo va li mombaa, neendjebo mbali. Oinima aishe oyo va nyeka ko oi na ongushu yoN$15 000.

“Ovafekelwa fiyo opapa inava kwatwa no kape na eshi sha monika po,” Aiyambo ta ti.