Victoria Kaapanda
ONGWEDIVA-Nonando iitukutuku mongashingeyi otayi dhana onkandangala noya konda oyendji omagulu, Lukas Martin okwa ti omagulu ge ogo oshitutuku she.
Martin ngoka a yambukile momukunda Okambebe, moshikandjohogololo shaEtayi momusati okwa ti ke na esiku a hepithe oshimaliwa she okufuta iihauto okuya kehala ta vulu okuya ko ta enda.
Ta ti koAngola oko ku na iimuna ye ayihe, oha yi ko ashike omalupita nonande egumbo lye olyi li kOkambebe hoka a valelwa. Okambebe oke li konyala ookilometa 35 okuya koAngola.
“Okuya poAngola mpoka ohashi pulandje ashike esiku limwe, ngele onda penduka ongula yoshilumentu, ngame ihandi longitha oowili dhoshinanena ohandi longo netango, etango sho tali ka pa oyana nangame moAngola omo ndi li”, Martin ati ngaaka.
Ta hokolola ta ti ondjila ye ohayi kala ofupi oshoka mondjila iha kala mo oye awike, iha ende nuusino we wu li utatu. Uusino ohau kala wa tentekwa oondongelwa dhe pombunda, moka mu na omakumbatha, iikutu nosho tuu.
Ta gwedhao ta ti ngele ta ende oto ti pamwe okwa sa nando uuza ashike oha ende ashike a tula ko ehokololo nuusino we. Esiku limwe ngele a tameke olweendo lwe komatango, ka vula okulala ta ende esiku alihe, oha egeke uusino we e ta lala kehe mpoka a mona ehala ta vulu okulala.
“Sho wu wete nda nyashuka ngeyi, okweenda kwandje kwiinano ile, ohauto kandi yi shi nando onde yi etha oku yi londa momumvo 2002, sho nda li nda ya koshipagelo kOvenduka. Ngele owa tala oomvula dhandje oto ti otandi fundju,” Martin osho a ti ngaaka.
Ta ti okwa li a yambekwa naanona ye li 18 ashike yane oya hulako, omanga ye li 14 aniwa etango ashike lyi ya wete, kape na nando ogumwe e shi mpa e li. Omukulukadhi ke na sha ihe okwa ti oku uvite ombili sho e li oye awike.
Moonkundathana naKundana Martin okwa ti koAngola okwa li ha yi ko nando okonima yoomwedhi mbali, ashike paife oha yi ko kehe konima yiiwike iyali nenge itatu oshoka oha tila a adhe iimuna ye ya sa kondjala.
Ta popi ta ti ondjala yiimuna kayi li ashike moshilongo shika ihe naahoka ku na iimuna ye, osha faathana ashike.