Omukulupe gwomimvo 65 ngoka ta sile oshimpwiyu omutekulu gwe gwomimvo hamano, e na uulema, ihaa penduka, ye ishewe iha popi, ota indile oshigwana shi mu yambidhidhe oshoka anuwa okwa nyengwa.

Alina Timoteus oku li momukunda Elombe moshitopolwa shaHagwena, e li monkalo tayi yaga kesipa. “Omutekulu gwandje Simon Nekwaya Amukoto oha mono ashike N$250 komwedhi, oshimaliwa shoka inaashi gwana nando okugwanitha po oombumbwe dhe muule womwedhi,’’ ta ti ngaaka.

Ta hokolola kutya aakuluntu yomunonona ayehe ihaya longo, nuuna oN$250 ndjoka ya pu po, oha hupile moshimaliwa shomukulupe shopenzela, shoka natango hashi yambidhidha nokugwanitha po oompumbwe dhegumbo alihe.

“Amukoto okwa li a valwa nuunkundi tau ithanwa Pan hydrocephalus, ngoka tagu fatululwa kutya oku na omeya momutse, ihe kakwa li tu na oshimaliwa shoku mu kuthitha omeya ngoka momutse,” ta fatulula ngaaka.

Ta ti, Amukoto iha vulu oku enda kuye mwene, nohashi mu ningile oshidhigu, oshoka naye omukulupe, ita vulu okukala e mu humbula unene ngele taya yi ya ka mone uuhaku.

Ta gwedha po kutya, omolwuunkundi we, iha vulu oku enda, ohashi ya thiminike oku mu humbata sigo oompoka taya mono oshiyenditho.

“Ongame tandi sile oshimpwiyu omutekulu gwandje, oshoka yina natango oku na ohanona, onkene ita vulu okukala nayo ayehe ye li yaali,’’ ta popi ngaaka.

Ta popi kutya okwa lulilwa, na ke shi shoka e na okuninga, oshoka openzela ye ohayi pu po ashike kokuyambidhidha nokugwanitha po oompumbwe dhomutekulu gwe.

Timoteus ta ti, omutekulu gwe natango oha zala ominambo ndhoka odho unene hadhi mana po oshimaliwa.

“Otandi indile moshigwana, komusanamutimahenda ngoka ta vulu okuyambindhidha ndje naashoka e na po nenge nokatemba opo tu kale tatu mu undula pehala lyoku mu humbata,’’ ta ti ngaaka.

Ta indile ta ti, okwa hala wo okuyambidhidhwa nokatalashe kokulala oshoka mpoka ha lala paife itapa hokitha nando.

Amukoto okwa ti kehe ngoka a hala oku mu yambidhidha na dhenge koonomola  0817387756/ 0812388033. -vkaapanda@nepc.com.na