New Era Newspaper

New Era Epaper
Icon Collap
...
Home / Omukweyo koshipangelo shaShakati gwa shololitha aanumvu

Omukweyo koshipangelo shaShakati gwa shololitha aanumvu

2020-05-06  Victoria Kaapanda

Omukweyo koshipangelo shaShakati gwa shololitha aanumvu
Top of a Page

ONGWEDIVA - Aantu ya pita pomathele gane, oya li ya thikama momukweyo omuleeka ngoka gwa thika sigo okopate yiihauto ongula yEtiyali komeho goshipangelo oshinene shaShakati, ya tega okuya meni opo ya ka yakulwe.

Yamwe yomaamvu oya li ya ka pangwa, omanga yalwe oya li ya ka tala omiti dhawo dhomikithi dha yooloka.  Shika osha li sha etithwa kepato ndyoka lya li lya ningwa oshilongo ashihe okuza momasiku 28 Maalitsa nuumvo.
Aantu oyendji oya li ya patelwa komahala gi ili nogi ili, kumwe kaku na iipangelo iinene, nenge kaku na omayakulo ga pumbiwa ashike oge na ashike okumonika koshipangelo oshinene shaShakati.

Anna Nelago Ekandjo a za komukunda Oshikolongondjo, moshitopolwa shaShana, okwa li a lombwele Kundana ongula ndjoka ta ti poshipangelo okwa li e ya po pontano yongula, ihe omukweyo okwa adha nale gwa pita mo moshipangelo gwa thika kopate.
“Ondu uvite kutya atuhe otwa pumbwa okuyakulwa nena, ashike kandi shi wete tatu ka mana nena. Paife omulongo ihe natango ondi li momukweyo, nekalata ine futa, nena andi ka yakulwa pongapi?”  Ekandjo ta pula ngaaka.
Ekandjo ta ti, aapangi yomoshipangelo shoka ohaya ende kashona, onkene okwa tegelela okumona omayakulo ashike ngula, aniwa okwa teka nale omukumo.

Gumwe ngoka a li naye momukweyo gwaamboka taya ka pangwa, okwa ti oshipangelo ehala lyi na oshilonga moonkalamwenyo dhoyendji, onkene kakwa li pe na okukala pwa tulwa oondjindikila, uuna gumwe a huka koshipangelo pethimbo lyepato lyoshilongo.
“Tala ashike aantu ayehe mboka, nani aantu ethimbo alihe ndyoka okwa li ya idhidhimikila ashike uuvu momagumbo oshoka oya tila okuya kiipangelo sho kwa tiwa naya kale momagumbo nenge itaya pitikwa okupita poomboloka, okuya kiitopolwa hoka ku na uuhaku,” Meme gumwe a popi ngaaka.

Ta gwedha po ta ti ngele ope na natango edhilaadhilo lyoshilongo tashi ka pata medhina lyomukithi nguka gwoCovid-19, epangelo nali tale po nawa pepato lyiitopolwa oshowo aanuvu taya ka pumbwa oondohotola oshoka nani otaya ka kanitha oomwenyo odhindji.
Kundana sho a li a tala nawa momukweyo ngoka, okwa li a monomo yamwe ya kuutumba yo taya nyenyeta kutya oye uvite nayi, onkene itaya vulu okuthikama ethimbo ele, taya ti  kaye wete taya wathelwa oshoka omukweyo omule noonkondo.
Sem Mathias a za komukunda Otamanzi okwa ti, ye okwa ila omiti dhe, ndhoka a li a shangelwa kundohotola esiku oshilongo kwa li sha patwa ashihe, ihe kakwa li e dhi adha mo mo aputiyeka.

“Nena onda ila omiti dhandje oshoka natango inandi tya po hwepo. Kakwa li nda pewa omiti dhandje dha gwana po oshoka kadha li mo. Ondi li ashike momukweyo omuleeleka ashi vulika sho tandika ka thika, natango omiti ndhoka nda ila kadhi mo,”Mathias a popi neyeme ngaaka.
Nonando ongaaka aantu kakwa li ya landula omalombwelo ga tulwa po okukeelela omukithi gwoCovid-19 ngaashi okuputithapo omahala pokati kawo. Aashonashona kwa li ya zala umaska.
Omukuluntu gwoshipangelo shaShakati Dr Korbinian Vizcaya Amutenya, kakwa li ta monika ethimbo ndyoka a tye ko sha. 


2020-05-06  Victoria Kaapanda

Tags: Oshana
Share on social media
Bottom of a page