New Era Newspaper

New Era Epaper
Icon Collap
...
Home / Omulandithi gwomihaka ta indile aanyasha ya nyangadhale

Omulandithi gwomihaka ta indile aanyasha ya nyangadhale

2024-05-28  Correspondent

Omulandithi gwomihaka ta indile aanyasha ya nyangadhale

Paulina Ndalikokule 

Omulumentu gwomivo 30 ngoka ha hupu mokulanditha omihaka okwa indile aanyasha ya nyangadhele noongeshefa opo yi imomenene iiyemo. 

Simon Kanghameni okwa dhika omasiga ge gane momutenya popepi nomatala gaShakati, ashike shoka ihashi mu imbi a yakule aalandi ye neimemeho nonondjungu. 

Omunyasha nguka oye gumwe gwomaantu oyendji ya kanithile iilonga molwomukithi gwoCovid-19 mo2020. 

Okwa ti okwa li ha longele ehangano hali teleke momakulo gaUnam ndyoka lya pata pethimbo lyocorona sho oosikola dha pata, molwezaza nompumbwe yoshimaliwa, Kanghameni okwa tameke okulanditha uumboloto wu na omuhaka pokati opoa iipaluthe mwene nofamili ye ndjoka ya kala nokuhupila modjambi ye. 

“Ongeshefa njyono inayi ka enda nawa oshoka onkalo yombepo monooli oya pupyala unene, uumboloto ohawu ningi nayi mbala,” a ti ngaaka. Okwa tameke ishewe okulanditha okapana momalukanda gaShakati te ka teleke kokasiga kohaasa ke li kokambasikela hoka ha ende nako. 

Ongeshefa ndjoka nayo inayi ka enda nawa oshoka onyama oyi na ondilo. 

Nonando a kala nokunyengwa, Kanghameni ina teka omukumo okwa dhiladhila ishewe a kambadhale okulanditha omihaka dha kangwa. 

Mongashingeyi omvula ontine ta landitha omihaka dhe, nokwa gwedha po nokuli ehuli lyongombe nalyo he li kanga. Okwa kutu woo aaniilonga yaali. 

“Uumentu wandje mbuno ohawu ka landitha tawu kongo ookasitoma nuumbasikela manga ngame tandi tsikile okukanga nokuyakula mboka taya piti po,” a ti ngaaka. Okwa ti aantu oyendji oye hole omayakulo ge nomesiku oha vulu okuzimbuka nomathele gahamo. 

“Ngele onda teke omihaka, eehaasa nokufuta aaniilonga yandje ohandi thigala po nomayovi gatano nenge gevule po omwedhi kehe,” a ti. 

Okwa ti oha tsakaneke omaupyakadhi gaantu haya yakula nokufadhuka po nomihaka dhe nosho woo okuyugwa iimaliwa mbyoka a longa. 

“Ohatu tidhwa po wo kumuni pehala mpaka ashike itandi vulu okuza po oshoka momatala omu udha mo kamu na ookasitoma. Kanghameni oku na onzapo yokuteleka okuziilila koshiputudhilo shoCosdec, ta hokolola nkene ina ka mona ompito yoku ka ilongela uulongi koUnam nonando a piti ondondo ontimulongo nontiyali niitsa o29. 

“Kakwa li pe na ngoka ta vulu okufitila ndje, inandi vula woo okumona omukuli, uupyakadhi wu li po owo mboka kutya uukwatya wameme ponzapo yandje yevalo inawu tsa kumwe naamboka wu li ponzapo ye opo ndi pewe omukuli gokufuta eilongo lyandje,” a ti ngaaka. 

Okwa ti okwa hulile muunyengwi okupukulula epuko ndyoka kuuministeli woonzapo, sho yina a hulitha. 

Haufiku Timoteus okamentu komimvo 15 okwa ti okwa kongo iilonga konima sho ina mona we ehala lyondondo ontihetatu mosikola. 

-ndalikokulep@gmail.com 


2024-05-28  Correspondent

Share on social media