ONGWEDIVA - Omukulupe gwomimvo 72 Cornelius Ndinghoshi Nakanyala, gwomomukunda Akazulu moshitopolwa shaShikoto okwa thigwa pomutenya sho egumbo lye lya pipo thiluthilu komulilo.
Oshiningwanima shoka osha li sha holoka Etine lya zi ko, moshanga shomutenya omanga aanegumbo yamwe ya li ya za mo megumbo.
“Egumbo lyandje olya pya po thiluthilu. Kandi na sho nda hupu po nasho kakele kiikutu mbika nda zala kolutu. Otandi indile moshigwana shi yambidhidhe ndje, opo ndi thitike mpoka pwa zi. Ondi na ezimo enene onkene onda hala okutungulula egumbo lyandje,” Nakanyala ta ti ngaaka.
Nakanyala okwa lombwele Kundana ta ti, mOshiwambo ohaku ti, omulilo ohagu lalwa, onkene oy ali ya dhike ondunda yimwe manga, opo ya mone olukalwa lwopokathimbo.

Ta hokolola ta ti, omulilo ngoka ogwa etwa komutekulu gwe gumwe, e na omimvo ndatu. Ta ti, megumbo okwa li mo naatekulu ye yatatu ye li kohi yomimvo ntano.
Ta ti, ota pandula oshoka inamu monena nando ogumwe oshiponga.
Nakanyala ta hokolola ta ti, okwa li a kuutumba poshipundi a gondja, nani oku li po ashike ta kotha. Omutekulu gwe ngoka okwa li a ka tala oshikuni shi na omakala inaaga dhima nawa kelugo, e te shi umbile kombanda yondunda yomwiidhi, e tayi tema.
“Ondi na uunkundi womagulu. Omulilo sho nde ke gu mona otagu yangata nale, onda li nda yi puushiinda, nonande kakwa li tandi vulu oku endelela oshoka empango lyandje onde li thigipo, sho nda haluka komulilo,” Nakanyala ta popi ngaaka.

Nakanyala ta ti, okwa kanitha oshindji megumbo lye. Ta ti, omukulukadhi gwe ngoka oye amushanga gwomukunda gwawo, naye okwakanithilemo  iimaliwa mbyoka ha pungula.
Ta gwedhako ta ti, ita vulu okutengeneka ongushu yiinima ayihe ya pila megumbo oshoka oyindji unene. Ta ti, iilya yawo ya li ya longo omvula ndjika nayo oya pya po thiluthilu, inapu thigala nando olata yimwe.
“Kakwa li tandi vulu okudhima omulilo kungaye mwene omolwa uunkundi womagulu mboka ndi na, ngeno onda kambadhala  okudhima mpoka te vulu, naashiinda sho ya ka thika, egumbo alihe olya kwata nale omulilo,” Nakanyala a hokolola.