ONGWEDIVA - Ohanona yoomwedhi hamano oya si eso enyanyaleka sho ya pile megumbo.
Oshiningwanima shoka osha ningwa Etitano lya zi ko molukanda Uukango Park, moshitopolwa shaHangwena. Hekulu yokahanona hoka Andreas Nghiyolwa okwa ti omulilo ngoka kagu shuwike mpoka gwa zi.

“Esiku ndyoka megumbo inamu telekwa, inamu temwa omulilo. Omulilo ngoka katushi oku gu hokolola kutya ogwa zi peni opo gu fike ondunda ndjoka. Ope na mboka taya popi kutya pamwe okwa li kwa tulwa ongodhi kotyatyela e tayi topa, ihe kakwa li ku na nande ongodhi koopulaka, noopulaka dholusheno inadhi kala dhi na uupyakadhi nando owasha,” Nghiyolwa ta ti ngaaka.
Ta hokolola ta ti ohanona oya li ya kotha mondunda omanga omumwayina gwa yina ngoka  a li ta iyogo.
Aniwa okwa li a uvu okulila kohanona kwa ningi okundji e ta zi mo momeya. Sho a yi pomweelo gondunda okwa adha gwa ihaka kolwithi. 
Okwa kala nokukondjitha e gu egulule ihe okwa li a hulile muunyengwi. Ta ti sho a ka pondola omwelo oku  gu egulula, omulilo ogwa yaka nale nokushuna monima. Andreas okwa ti yina yohanona  okwali a za mo megumbo ethimbo ndoka omanga ngoka ha kala nohanona ali ta aneke iikutu pondje.

Okwa ti ondunda ndjoka ya pile ohanona inayi za nando osha, nuuthemba awuhe owa pila mo. Oya kanithile mo iinima yongushu yi vule N$ 60 000.
Hekulu yohanona okwa ti otashi kumitha noshe ya tula momalimbilo kutya oshike sha eta omulilo opo gu fike ondunda ndjoka ya li yi na ohanona ayike omanga ongulu ndjoka yi na omala gatano. Ta ti, egumbo alihe inali pya po komulilo ashike ota pandula kadhima mulilo ngoka a li eya okukwathela meendelo sho  lopotelwa.

Omukuluntu gwopolisi moshitopolwa shaHangwena, Zachariah Amakali okwa ti, oshiningwanima shoka osha     holoka potundi 11h50 yongula, momudhinjgoloko gwaEenhana.
“Otwa lopotelwa kutya omulilo ngoka gwa dhipaga ohanona, otagu fekelwa gwafa gwa zi koopaka dho lusheno ngoka gwa tamekele mondunda moka kwali kalala,”Amakali a popi ngaaka.
Amakali okwa kumagidha aavali ya kale taya sile oshimpwiyu aanona mboka taya vulu okudhana omililo oshowo ya kale kehe ethimbo ye li popepi naanona mboka itaya vulu oku ikwathela 
yoyene.