Omulongi posikola yopaumwene ye dhina June-8 Hillside Christian, Corien Steenkamp omutiligane, okwa tidhwa miilonga sho a li a ulike okatongotongo komalungula. Steenkamp okwali a shanga kepandja lye koFacebook ta ti aaluudhe iinamwenyo, neputuko ina li nuninwa aaludhe, oshowo ombimbeli inayi shangelwa aaludhe. Natango okwa li ashanga ta ti, “etheni shi ningine momakana geni ga mbuta noga nika, eta mushuna miihwa mu kalye iikulya yambuta, ngaashi ooho noonyokokulu yonale nale,” Steenkamp a tsikile ko ngaaka.
Omulongisikola posikola mpoka Jansen C-jay okwali a koleke mokavidio keli komalungula, ta ti, Steenkamp ngoka a li omulongi, a kutwa pokathimbo, oye mu tidha meendelelo konima sho ya lopetolwa shoka a li ashanga komalungula.
“Onda hala oshigwana shi uve ko kutya, shoka sha shangwa komalungula kuSteenkamp, kashina sha nosikola yetu. Osikola yetu kayi na okatongongo naa shoka kashi mo momitima dhetu. Osikola yetu oyi li kokule noombepo dha tyaa ngaaka, otu hole kehe gumwe,” Jansen ta ti ngaaka.
Ta gandja ombili moshigwana ta ti, kehe shoka sha popiwa kashina sha nosikola yawo, yo oye na ombili, ka ye na okatongongo. Ta ti ombimbeli otayi ti, kala wu hole muushinda shoye ngaashi wii hole mwene.
C-jay okwa ti, otaya landula omilandu adhihe ngaashi dhili, nkene omuntu e na okulalekwa miilonga opo ya tidhe Steenkamp. Mongashingeyi okwa tulwa pevi pakathimbo, ashike mEtitano twa taa lela Steenkamp otaka lalekwa miilonga sigo aluhe, oshoka shoka aninga oshili ompinge notashi yonagula ethano lyosikola ndjoka no kape na nando edhime po lyasho a ningi–Jansen ta ti.
Shika natango oshali sha hwahwameke oshigwana komalungula, oyendji oya kala taya shanga kutya omulongi ngoka na tidhwe miilonga, oshoka ota eta okatongotongo moNamibia. Taya ti kapena omuvali ta hala omona taka longwa komulongi e na okatongotongo. Yamwe yomwaakwashigwana otaya ninga omahololo madhilaadhilo ge li ompinge naashoka sha nyolwa kuSteenkamp, omanga yalwe taya ningi omatilitho taya ti otaye mu kongo.
Komalungula oko tuu hoka, oku na yalwe taya kwatakanitha oshinima shika kumwe nedhipago lyomuluudhe omukwashigwana gwaZimbambwe ngoka a dhengwa sigo omeso oshiwike shazi ko kaalumentu yatano. Yali yomuyo iilumbu mbyoka ya li ya fadhuka po ashike oyaka kwatwa konima yomasiku gaali.