New Era Newspaper

New Era Epaper
Icon Collap
...
Home / Omulumenhu a dengwa okufya eshi kwa li a ka vaka omapungu nakaume kaye

Omulumenhu a dengwa okufya eshi kwa li a ka vaka omapungu nakaume kaye

2022-05-20  Festus Hamalwa

Omulumenhu a dengwa okufya eshi kwa li a ka vaka omapungu nakaume kaye

Omulumenhu weedula 21 okwa fya eshi a dengwa fiyo okufya Etivali lwopotundi 05h30 keengulasha momukunda Okuruokape moshitukulwa shaMaheke.

Nakufya okwa tongolwa oye Venondjamo Kandorozu omukalimo womukunda Okuruokape.

 Komufala wopolifi moshitukulwa shaMaheke Commissioner Andreas Haingura okwa hokolola ta ti Kandorozu okwa li a ka vaka omapungu moshikunino pamwe nakaume kaye efimbo loufiku.

Okwa ti eshi vati ovalumenhu tava ende tava di koshikunino va umbata oshako yomapungu mukwao umwe okwa mona omunhu ta di monina yavo ta lotoka te va landula e kwete oshinima shialula peke.

Vati okudja opo ovalumenhu ova faduka po nokuli va uka moixwa ashike Kandorozu okwa shaala monima shaashi kakwa li ta dulu okulotoka onhapo yoshidudu.

Opolifi oya hokolola tai ti vati eshi omulumenhu mukwao a faduka po okwa ya keumbo nokonima mongula eshi kwa sha okwe uya okulandula kaume kaye kutya oku li peni.

Vati eshi omulumenhu e uya okwa hanga olutu laKandorozu la kupulwa moixwa li li mexungu lohonde nomesho a dinda nomatwi a dinda eshi a dengwa.

Kaume kaye okwa endelela opo a shivifile opolifi kombinga yoshikumungu eshi ashike eshi opolifi ya fika oya hanga nale a xulifa.

Kape na omufekelwa a kwatwa po shaashi kape na ouyelele kutya Kandorozu okwa dipawa kulyelye.

Onghee omakonakono opolifi otaa twikile novakwapata vaye ova shivifilwa efyo laye.

– fhamalwa@nepc.com.na

 

 

 

 

 

 

 

 

 

 


2022-05-20  Festus Hamalwa

Share on social media