Omulumenhu weedula 29 okwa pewa enghava moshipala pefimbo kwa li vati omufekelwa ou ta kendabala okukwata onghonga omukainhu womuhongifikola.

Oshiningwanima eshi osha ningilwa komaumbo ovahongifikola kOnambwebwe Combined School efimbo lokonguloshi mexuliloshivike. Omukonakoni woimbuluma moshitukulwa shaHangwena omupedu Commissioner Zachria Amakali okwa hokolola ta ti omufekelwa ou okwa ya keumbo lovahongifikola ndele ta nukile omukainhu oo a hanga ta di kokalikoshelo.

Vati omufekelwa okwa dula mo oikutu yaye nokonima okwa nyeka ko elapi olo kwa li omuhongifikola e lituvika nalo.

Opolifi oya hokolola tai ti omufekelwa okwa dulika eenghono kunakuninga oshihakanwa pefimbo kwa li tava kondjo.

Omufekelwa vati okwa nanwa koulumenhu waye nokutendwa enghava komukainhu osho she mu etela opo e lidenga po nokudja opo okwa faduka po. Omufekelwa okwa fiya po oikutu yaye osho sha eta opo a kale a kwatwa po shaashi oikutu oya ka dimbulukiwa kutya oyaye. Oshiningwanima shikwao, omukainhu weedula 33 okwa fitikininwa mokandjuwo komulumenhu oo kwa li vati ta kendabala oku mu kwata onghonga.

Opolifi oya hokolola tai ti nakuninga oshihakanwa okwa li a ya kongeleka koxungi.

Omufekelwa okwa faduka po nomakonakoo polifi otaa twikile.

fhamalwa@nepc.com.na